Mef`ûlü fâ`ilâtü mefâ`îlü fâ`ilün
1 Pervâne gibi yanmayıcak nâr-ı aşka ten
Ol şem`-i hüsne vasl olımazsın cihânda sen
2 Sâgar da yandı üstine pervâneveş anun
Gice surâhî olmuş idi şem`-i encümen
3 Pervânedür ki bâl ü perin yakdı âteşe
Şem`-i ruhunda hâlün eyâ serv-i sîm-ten
4 Şevk-i ruhunla şem`-i şeb-ârâdur kamer
Pervâne her taraf ana encüm felek legen
5 Yahyâ'yı yaksa nâr-ı elem yâre gam degül
Pervâ ne şem`e derd ile pervâne yanmadan
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147