Ramazâniyye Berây-ı Vezîr-i A‘zam İbrâhim Paşa

17
 Ramazâniyye Berây-ı Vezîr-i A‘zam İbrâhim Paşa
 
 mefâ‘îlün mefâ‘îlün mefâ‘îlün mefâ‘îlün
 
 1 Hilâl-i savmı ol kim gûş-ı câna müjde-bahşâdur
 Meh-i ‘ıyd-ı zer-endûd olsa müjde yine ednâdur
 2 Melâ’ik yakdılar kındîl-i ‘arşı câmi‘-i Kuds’e
 Zemîn üzre nizâ‘-ı yevm-i şek bîhûde gavgâdur
 3 Koyup peyveste satr-ı kehkeşâna nokta-i şekki
 Galat ma‘nâya bâ‘is gâlibâ necm-i Süreyyâdur
 4 Yüzin göstermedi vaktinde dîdârı ‘azîz itdi
 Bu da hasret-keşâna başka bir semt-i tecellâdur
 5 O şem‘-i bezm-i akdes hıfz olınmaz mı eser yelden
 Döner çerh-i felek üstinde bir fânûs-ı mînâdur
 6 Şafak sanma kemâl-i ihtimâm-ı dest-i kudretle
 O fânûs üstine pûşîde gûyâ al dîbâdur
 7 Güneş pervâneveş ol şem‘i devr itmek ba‘îd olmaz
 Bütün mahv-ı sevâd-ı defter-i sâlin temennâdur
 8 N’ola berter olursa kadri hurşîd-i cihân-tâbuñ
 Mübârek makdemine cümleden evvel cebîn-sâdur
 9 Açıldı genc-i rahmet hâzır olsun mağfiret-hâhân
 Dem-i bahşâyiş-i feyz-i İlâhî vakt-i yağmadur
79
 10 Degül cây-ı ta‘accüb rûzı şebden olsa efzûnter
 Beli sâhib-riyâzet çok yaşar ‘âlemde mümzâdur
 11 Şeb-i hâlet-fezâsı aksar olmakda müveccehdür
 Ki hengâm-ı safâ pâ der-rikâb olmak bu ma‘nâdur
 12 Firâr itse degül bî-câ verâ-yı Kâfa dek İblîs
 Gelen hançer be-kef mâh-ı sıyâm-ı zühd-peymâdur
 13 Dutıldukça hümâ-yı devleti sayd u şikâr oldı
 Bozuldukça tılısm-ı genc-i lâ-yefnâyı ifşâdur
14 Şikest olsun başında mey-fürûşuñ câm-ı billûrı
 Cilâ-yı dîdemüz envâr-ı kındîl-i musaffâdur
 15 Müzeyyen zîr ü bâlâ nûrdan kındîl ile şimdi
 Cevâmi‘ cennet ü her bir menârı nahl-i Tûbâdur
 16 Bu eyyâm-ı ferah-encâmuñ evsâfı degül mümkin
 Ki evvel vakti savm u âhiri ‘ıyd-ı tarab-zâdur
 17 Nice feth olmasun nazm-âverâna genc-i ma‘nâ kim
 Huceste vakt-i dâmen-bûs-ı İbrâhîm Pâşâ’dur
 18 Ne paşa belki dâmâd-ı şehinşâh-ı melek-haslet
 Cihâna ni‘meti mebzûl olan bir zât-ı vâlâdur
 19 Cenâb-ı sadr-ı a‘zam bedr-i efham hâris-i ‘âlem
 Hıdîv-i muhterem revnak-fezây-ı sadr-ı vâlâdur
 20 Dilîr-i ma‘delet-güster müşîr-i memleket-perver
 Zihî destûr-ı nâm-âver-i salâh-ı kâr-ı dünyâdur
 21 Hayır-hâh-ı medâr-ı saltanat zînet-dih-i devlet
 Penâh-ı memleket fermân-revâ-yı rûy-ı gabrâdur
 22 N’ola ‘unvânı destûr-ı ebu’l-hayr-ı zamân olsa
 Hemîşe fikri hayrât ile dünyâ mülkin ihyâdur
 23 ‘Adâlet-pîşedür insâf olınsa zâtıdur şimdi
 Medâr-ı intizâm-ı saltanat gayrı müdârâdur
 24 Nevâzişle keremle ol Aristo ‘akl-ı dânânuñ
 Umûr-ı saltanatda bezl-i makdûrı temâşâdur
 25 Ko tasdî‘i du‘â-yı devletinde Kâmiyâ sa‘y it
 O dem kim sâ’imân iftâr içün hâzır müheyyâdur
80
 26 Ola makbûl-i dergâh-ı İlâhî cümle tâ‘ati
 Müyesser ola her âmâli kim pinhân u peydâdur
 27 Sa‘âdet-yâb ola tekrâr ü emsâliyle bu ‘ıyduñ
 Ki devletle bekâsı matlab-ı a‘lâ vü ednâdur
 
Yrd. Doç. Dr. Gülgün Erişen YAZICI,, Edirneli Kâmî ve Divanının Tenkitli Metni, (Basılmamış doktora tezi), A. Ü. Sosyal Bilimler Enstitüsü , Ankara, 1998,- https://ekitap.kulturturizm.gov.tr/Eklenti/10619,kamipdf.pdf?0