Ramazâniyye Der-Na‘t-ı Resûli Ekrem SAV
22.01.2018Ramazâniyye Der-Na‘t-ı Resûli Ekrem SAV
..-- / ..-- / ..-- / ..-
1.Habbezâ mâh-ı şeref-bahş-ı mübârek ramazân
Âyet-i rahmet-i Hakdur ki nüzûl itdi hemân
2.Merhabâ şehr-i mükerrem ki kudûmı virdi
Fâsıka renc ü ‘anâ mü’mine nûr-ı rahmân
3.Mâh-ı nev sanma sipihr üzre nümû-dâr olmış
Varak-i reng-i kebûd üzre berât-ı ihsân
4.Hâce-i çarh-ı felek geldi mübârek bâda
İtdi mûm şenligi zann itme nücûm-ı rahşân
5.Kadem-i mâha nisâr itdi felek mürvârîd
Âsumân üzre idüp ‘ıkd-ı süreyyâyı ‘ayân
6.Kadem-i müjde-i mâh-ı ramazâna yâhûd
Zer-efşân hil‘at ile itdi semâyı pûşân
7.Hey’et-i kâ’ide-i seb‘a-i seyyâre degül
Yakdı şâm-ı ramâzan içre kanâdîl keyvân
8.Gör hilâl-i ramazân ‘arz-ı cemâl eyleyicek
Hacletinden yirüñ altında güneş oldı nihân
9.Ümmet-i müznibe bu mâ’ide-i rahmetdür
Mûy-ı her-ten idemez şükrini ger olsa zamân
10.Eyledi def‘ kudûmıyla şürûr –ı fıskı
28 “İnandık.”
Hâtem-i savm ile ma‘mûr-ı kerem oldı dehân
11.İdeli mâh-ı levend-i ramazân şehre nüzûl
Kendini duhter-i rez eyledi humda pinhân
12.Bâde-i nâba bedel vird ile hasb ide ciger
Bâde-nûşâne olınca müteveccih ‘armân
13.Zühd ‘azîz olalı ‘âlemde şu düşdi hisse
Haşerât-ı fitene –i mülk-i ‘ademde zindân
14.Câmi‘ ü mescidüñ ebvâbı küşâde olalı
Oldı metrûk-ı cihân hân-kah-ı pîr-i mugân
15.Bâde vü nuklı gören şimdi meger kim eyler
Zekan-ı reng-i şarâb-ı leb-i dil-ber seyrân
16.Oldı manzûrı meger hüsn-i hilâl-i ramazân
Berş efyûn –horı gör büt gibi kaldı hayrân
17.Dâs-ı tîz oldı yâhûd şekl-i hilâl –i şa‘bân
Gerden-i hûşe-i keyf ehlini çekmekde hemân
18.Hâsılı gulgule-endâz-ı kudûmı virdi
Kimine nûr-ı şeref kimine derd-i bürkân
19.Bu şeref her şeb aña tâ-be-seher besdür kim
Zâ’ir-i ravza-i şâh-ı resûl olur her ân
20.Nice şâh-ı resûl ol kim aña mahbûbiyyet
Kadd-i zîbâsına gûyâ ki biçilmiş kaftân
8b.
21.Sırr-ı Levlâke muhâtab şeh-i ‘izzet- kevkeb
Lutf-ı âverde-i Rab mahzen-i sırr-ı Sübhân
22.Rahmet-i ‘âlemiyân ‘illet-i îcâd-ı cihân
Bâ‘is-i kevn ü mekân server-i her nefes ü cân
23.Püşt-gîr –i ümerâ muzlime-dâd-ı fukarâ
Sıla-bahş-ı şu‘arâ pâdişeh-i her dü-cihân
24.Menba‘-ı lutf u kerem muhbir-i gülzâr-ı irem
Sâdıkü’l-va‘d-i harem vâsıf-ı sırr-ı Kur’ân
25.Zînet-i arz u semâ hazret-i mahbûb-ı Hüdâ
Reh-ber-i râh-ı hüdâ vahy-i resân-ı Mennân
26.Hazret-i fahr-ı resûl Ahmed-i muhtâr ol kim
Yaradıldı yüzi suyına anuñ kevn ü mekân
27.Öyle bir şâh-ı kerem-pîşedürür kim her dem
Kapusı halkasıdur ümmetine dâr-ı emân
28.Hâsıl-ı bâr-ı güneh-kâre ne gamdur olsa
Lebi merhem-deh-i zahm-ı dil-i ümmet cünbân
29.Oldı mahz saña çün kim ki makâm-ı Mahmûd
‘Âsiyânı idemez nâr-ı cehennem sûzân
30.Makarü’l-hamd senüñ ümmetüñe reşk eyler
Ümmet-i ‘ârif –i kalb-i kudemâ-yı devrân
31.‘Akl-ı kül ‘ilm-i ledün içre sabakdaşuñdur
Yine ümmîlik ile şöhretüñ ey şâh-ı cihân
32.Takviyet-bahş ola tâ kâ’ide-i lutfuñla
İtdi te’hîr-i nüzûl vakt-i Mesîhâya zamân
33.Kandurur ümmet-i dil-teşneñi rûz-ı mahşer
Eyleseñ lutfuñıla âb-ı şefâ‘at cereyân
34.Olmasa dâr-ı şifâ-yı keremüñ dünyâda
‘Âlemüñ derdine olmazdı cihânda dermân
35.Mey-i lutfuñla şinâsetdür olursa nola
‘Andelîb-i kalemüm tarz-ı gazelde gûyân
36.Nûr-ı ruhsâruñı seyr ideli ey şâh-ı cihân
Eyledi mihr-i muhabbetde vücûdın sûzân
37.Nâzır-ı tâb-ı temâşâ-yı cemâlüñ olamaz
Kudsiyân-ı harem-i hâs olurlar heyvân
38.Âhu-yı deşt-i Hıtâ hûn-ı dilin müşk eyler
Sürme rîzîde-i mâzâg-ı basardan müjgân
39.Nefha-i bûyuñ iren kimse dimâga nitsün
Sünbül-i cennet ü gül-deste-i bûy-ı reyhân
40.Kadd-i zîbâñ ile ol turraña kurbân olsun
Bûy-ı ezhâr-ı ‘Aden server-i serv-i çemân
41.Saña biñ cân ile âşufte hezâruñdur hep
Bülbülân-ı melekût ey gül-i bâg-ı ‘Adenân
9a.
42.Kumrı-ı cân-ı fakîr olsa idi makbûlüñ
Hasret-i şevk-ı cemâlüñle iderdüm kurbân
43.Dest-gîr ol koma üftâde Sa‘îd –i zâruñ
Bir kuluñdur kapuña geldi getürdi îmân
44.Ey şeh-i mükremet-i dâd-ı şefâ‘at-kârân
Ser-i dîbâçe-i rahmetde Muhammed ‘ünvân
45.Sensin ol mazhar-ı sırr-ı kerem-i Hayy –ı kadîr
Hizmetüñde senüñ olmakda melâ’ik pûyân
46.Râh-ı tatyîb-i dil-i pâküñ içün buldı zuhûr
Dâr-ı cennetde olan cümle kusûr-ı eyvân
47.Rûz şeb ravza-i pâküñde çerâguñ olmış
Nûr-ı hurşîd –i ziyâ-bahş ile mâh-ı tâbân
48.Benüm ol râh-rev-i tâlib-i vâdi-i zülâl
Kesret-i zünb ile tahmîl olınup bâr-ı girân
49.Zann ider nâzır olan ‘ibret ile mahşerde
İnhinâ vü kad-i ham-küştemi gûyâ ki kemân
50.Oluram ümmetüñem rûy-ı keme şermende
Olmadum matlabuña râh-ı rızâñı cûyân
51.İtmem inkâr siyeh-rûy-ı tebeh-kârum ben
Nefs-i şûmum baña zulm eyledi feryâd u figân
52.Şöyle ‘isyân ile dil âyinesi jeng –âlûd
Ayamaz şâhid-i nev-hîz –i ‘amel-cilve bir ân
53.Dil hevâ vü hevese oldı rübûde o kadar
Her ne dem vakt-i salât olsa gelür bâr-ı girân
54.Ey kudûmı şeref-âverde-i ‘arşü’r-Rahman
Ey velî mahzen-i Hak mevrud u Hayyü’l-Kur’ân
55.Hidmet-i şâh –ı mecâzîye kasîde viricek
Sıla ümmîdin iderler şu‘arâ-yı devrân
56.Rûz-ı mahşer olıcak dir sıla ey şâh-ı kerem
Baña da nakd-i şefâ‘atle hemân hatt-ı emân
57.Kalemüm zemzeme-pîrâye suhan teng oldı
Kıl salavât demidür buldı kasîde pâyân
58.Nitekim sakf-ı semâvât-ı felek durdukça
İde âmed şodi hurşîd ile mâh-ı ramazân
59.‘Aded-i katre-i bârân-ı nücûmdan efzûn
Dahi her bir nefes-i tîz sebük-hayr-ı revân
60.Ravza-i şâh resûl rûz şeb olsun yâ Rab
Salavât-ı gül-i hoş-bûy ile hem-reng-i cinân
Saadet Karaköse, : Sa’id Giray Dîvânı, : © T.C. Kültür ve Turizm Bakanlığı Kütüphaneler ve Yayımlar Genel Müdürlüğü,2017 ISBN: 978-975-17-3636
0
0
Yorum Yapmak için Kayıt Olun veya Giriş Yapın