Râzdân-ı ışka hâlin âşıkân söyler yatur

 

 

63

 

 GAZEL-İ NEV-ZEMÎN-İ İLTİZÂM-ÂYÎN

 

 (Fâilâtün Fâilâtün Fâilâtün Fâilün)

 

 1 Râzdân-ı ışka hâlin âşıkân söyler yatur

 Derdini nabz-âşinâya hastegân söyler yatur

 2 Gelse bir şeb bî-tekellüf der-firâş olup o şûh

 Leb-be-leb dil-hâhını bana nihân söyler yatur

 3 Zahm-dârı her dem iskât idemez şîrîn-edâ

 Kıssa-ı zahmından etfâl-i hıtân söyler yatur

 4 Sîne sîr-âheng-i nâlişdir gelû dem-sâz-ı âh

 Hâlimi santûr u nây-ı pür-figân söyler yatur

 5 Vakt-i hicrân bâ’is-i efzâyiş-i efgân olur

 Her şebân-geh subh olunca bülbülân söyler yatur

 6 Haşmetâ kim nutk eder bu nev-zemîni yâ meger

 Zîver-i âgûş-ı talîmim olan söyler yatur

 

 

Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ