Reng-i ‘işve şîveñe bir hüsn-i diger virmese

Fâ‘ilâtün Fâ‘ilâtün Fâ‘ilâtün Fâ‘ilün

 

1. Reng-i ‘işve şîveñe bir hüsn-i diger virmese

Âb-ı şîve şu‘le-i ruhsâruña fer virmese

2. Telhi-i hicrânuña tâkât getürmezdi göñül

Fikr-i vasluñ lezzet-i gül-kand-ı sükker virmese

3. Ol behişt-i nâz olmazdı tarâvet-yâb-ı hüsn

Sel-sebîl-i vasl aña peygâm-ı kevser virmese

4. İ‘tibâr itmez metâ‘-ı vasluñ istibdâline

Eşk-i ‘âşık sîm-i ruhsârı eger zer virmese

5. Sâyesine kim ider ol nev-nihâlüñ ilticâ

Refte refte şâhsâr-ı kâmeti ber virmese

6. Ayagın öpdürmege kâ’il mi olurdı meger

Bî-ser ü sâmânlar ugurına ser virmese

7. Hîç mümkin mi idi pâ-bend-i zülfünden rehâ

Âhû-yı ber-müşg-i gâv-ı bahrı ‘anber virmese

8. Müft-i nîsân-ı ‘inâyet reşha-rîz olmaz aña

Yılda bir kerre sadef ber-müşt-i gevher virmese

9. Bu zemînlerle ne mümkin kâm almak Kâniyâ

Kâm ruhsat-nâmesin çarh-ı sitemger virmese

 

Dr. İlyas YAZAR , K Â N Î D Î V Â N I, Ankara 2012

       Tokatlı Kani Hayatı Edebi Kişiliği Şiirleri

       Tokatlı Kani Divanı ve Diğer Eserleri