SADR-I A`ZAM KÖPRİLİ MEHMED PAŞA[YA] VİRİLÜP İN`ÂMLARI GÖRİLMİŞDÜR
 
Fe`ilâtün Fe`ilâtün Fe`ilâtün Fe`ilün
 
1 Ahsena`llâh zihî peyk-i sebük-pây-ı sabâ
Haber-i müjde ile oldı yine cilve-nümâ
2 Ne sabâ sâkî-i sahbâ-yı neşât-ı `izzet
 Ne haber neşve-ber-i ehl-i dil-i gam-peymâ
3 Ne sabâ micmere-gerdân-ı saf-ı dîn ü düvel
 Ne haber mâye-dih-i şevk-i nizâm-ı dünyâ
4 Ne sabâ şâhid-i şîrîn-harekât-ı `âlem
 Ne haber zemzeme-i hüsn-i edâ zevk-i vefâ
5 Ne sabâ bedraka-i râh-rev-i istikbâl
Ne haber debdebe-i şâhî-i `adl ü i`tâ
6 Ne sabâ müjde-resân-ı şüref-i mihr-i şerîf
 Ki kudûmıyla müşerref olıcak mîr ü gedâ
7 Kimdür âyâ didiler sadr-nişîn-i a`zam
Didi târîh ile destûr Mehemmed Pâşâ (H.1066/M.1655)
8 Eylemiş Hakk anı hem-nâm-ı Resûl-i sakaleyn
Hem bu dem hikmet ile oldı semiyy-i Dârâ
9 Biri zâhir biri bâtın iki sâhib-dîvân
Biri hurşîd-i hidâyet birisi zıll-i Hudâ
10 Sûret ü ma`nî-i ismine vekîl-i mutlak
Şer` ü kânûna odur şimdi hakîm-i dânâ
41
11 Sanmasunlar yalıñuz oldı müşâr-ı zâhir
Belki evvel idi bâtında ta`ayyün zîrâ
12 Böyle bir âsaf-ı rûşen-dili isterdi zamân
Ki ola herkese hâlince ri`âyet-fermâ
13 Hubb-i meh-pertevi `aks-efgen-i her-hâtır ola
 Re`y-i hikmet-revişi hüsn-i müdârâ-efzâ
14 Hâkim-i ma`dilet-efrûz u ehâlî-perver
Nâzım-ı lü`lü`-i ahkâm-ı kavânîn-ârâ
15 Böyle bir dâvere muhtâc idi halk-ı `âlem
Bile herkes şeref-i hayyiz-i mikdârını tâ
16 Nazar-ı şefkati sâmân-dih-i ser-geşte olup
 Cümle-i mültefeti dehre ide istignâ
17 Hâris-i mülk ü milel hâfız-ı mihr-i dâder
`Ârif-i dâd u sited yâver-i şer`-i yektâ
18 Böyle bir kâm ile müştâk idi erbâb-ı hüner
 Olalar dergehine kadr ile tâ nâsiye-sâ
19 Reşehât-ı kaleminden irişüp feyz-i eser
Kıla dil-mürdeleri lutf-ı himemle ihyâ
20 Zâtile mazhar-ı envâ`-ı ma`ânî vü usûl
Tab`ile genc-i dürer-bâr-ı hakâyık-pîrâ
21 Hamdü li`llâh kademi kıldı müşerref sadrı
 Oldı makbûl-i niyâz-ı `ulemâ vü sulehâ
22 Meşrebi oldugiçün resm-i garazdan hâlî
İtdi ikbâl-i teveccüh aña a`lâ ednâ
23 Olmasa levh-i dili nakş-ı sivâdan sâde
Herkes ikbâl ider miydi hakîkatle aña
24 Hak muvaffak ide tedbîr-i nizâm-ı mülke
Ola tevfîk-i hidâyet aña dâyim hem-pâ
25 Şevk-i gaybîle huzûrına gelüp dem-beste
Ola dil-beste-i dergâhı hemîşe a`dâ
26 İnkisârı tokınup düşmen-i dîn ü câna
 Hurd ide turdugı yerlerde ola nâ-peydâ
 
42
27 Zâtına devletine her kim olursa bed-hâh
Gele hakkından anuñ tîr-i belâ tîg-i kazâ
28 `Adl ü dâd ile muzaffer olup in-şâ`a`llâh
Kesb-i kuvvet ide dâd u dihişinden zu`afâ
29 Hâsılı istedügin buldı kulûb-ı `âlem
Başladı eylemege hâlini herkes imlâ
30 `Arz-ı hâl itsem iki vech ile ben de yeridür
 Gûş idüp vâkıf ola hâl-i perîşânuma tâ
31 Hele evvel ideyin pîş-i zamîr-i lutfa
 Bir niçe beyt ile ahvâl-i dilümden şekvâ
32 Var ola sâl-i çihil bir sanem-i müstesnâ
Aldı benden beni genc-i dili itdi yagmâ
33 Çâr u nâçâr göñülsüz gezerin `âlemde
Bilmezin n`idesimi bî-dil ü bî-tâb-ı kuvâ
34 Mîl-i âteş-keş olur dîdeme seyr it beni dir
 Hem idüp pey-zede-pâ dir baña ber-hîz ü biyâ
35 Dest-i cevrinde giriftâr-ı nizârem o kadar
Ki muhâl oldı mecâl-i ser-i kudret ammâ
36 Nâmî-veş dilde kemâl-i kereminden o bütüñ
 Yine hem-seyr ü hem-âgûş-ı visâlem tenhâ
37 Ebr-i nîsân-kefâ bahr-dilâ dâd-gerâ
Ey sütûde-reviş ü mefhar-i sadr-ı vüzerâ
38 Nice yıl künc-i kanâ`atde mukîm idi hakîr
 Olalı reh-zen-i râh-ı hüner erbâb-ı rişâ
39 Hamdü li`llâh yine ashâb-ı tarîk-i `ilme
Sâ`ik-i şîve-i gaybiyye olur râh-küşâ
40 Bürc-i maksûda irüp kevkebe-i fazl-ı hüner
Şeref-i zâtuñ ile oldı müşerref hâlâ
41 Tab`um olmasa felâket-zede-i devr-i felek
 Böyle mi rişte-keş-i nazm olur idim `acebâ
42 Reşk-i lü`lü` ü güher-zây olur idi hâmem
Nitekim olmış idi midhat-i şâhâna sezâ
43
43 N`ideyin nâtıkamı şermî-i deyn itdi hemec
 Yümn-i vasfuñda hele oldı bu deñlü gûyâ
44 Dergeh-i Vâhib-i âmâle niyâz-ı dil olur
Sebeb-i hüsn-i kabûlüñden irüp feyz-i recâ
45 Dest-gîr ol baña üftâde-i hâk-i râhem
 Tut elüm tuta elüñ kafile-bend-i şüfe`â
46 Dûdmân u halef-i pâk-nijâduñ üzre
Dâ`î-i devletüñe mülhak olam subh u mesâ
47 Ko bu tasdî`-i perîşânı suhan hatm olsun
Devlet ü `ömrine dest-i dil açup eyle du`â
48 Nitekim peyk-i nesîm-i seher olup pûyân
Getüre gülşene lutf-ı eser-i neşv ü nemâ
49 Nitekim müjde haber sâmi`a-gîrâna irüp
Vire âyîne-i hâtırlara şevk ile cilâ
50 Dem-be-dem hâtırına irişe peyk-i ilhâm
Re`y ü tedbîrini hıfz ide hatâdan Mevlâ
51 Dâyimâ müjde haberler idüp anı mesrûr
İki `âlemde ola yâveri hem `avn-i Hudâ
 
Yard. Doç. Dr. Ahmet YENİKALE  AHMET NÂMÎ  DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ