Şafakda mâh-ı nev hınnâlu bir barmaguña degmez

 

 

Mefâ‘îlün Mefâ‘îlün Mefâ‘îlün Mefâ‘îlün(1)

 

1. Şafakda mâh-ı nev hınnâlu bir barmaguña degmez

 Güneş zer tâs ile su koymaga ayaguña degmez

2. Kevâkib kebkeb-i sîmîn güneş ser-mûze-i zerdür

 Meh-i nev ey hilâl-ebrû senüñ başmaguña degmez

3. Kuşak çözmez nice merdâneler var ey ‘arûs-ı dehr

 Visâl umar miyânuñda mu‘akkad bâguña degmez

4. Dilâ germ olsa ebr içinde mihr ü mâh ile gerdûn

 Senüñ penbeyle yir yir sîne-i pür-dâguña degmez

5. Hilâli kaşuña ey meh nice teşbîh ider Emrî

 Felek devrinde vallâhi o bir barmaguña değmez

 

 

Prof. Dr. Mehmet A. Yekta SARAÇ, EMRÎ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3144 KÜLTÜR ESERLERİ 427