Sâkiya cur‘a benüm câm-ı mey-i nâb senüŋ

 

365

 

 Fe‘ilâtün Fe‘ilâtün Fe‘ilâtün Fe‘ilün

 

1 Sâkiya cur‘a benüm câm-ı mey-i nâb senüŋ

 Kem-terîn zerre benüm mihr-i cihân-tâb senüŋ

2 Nâ-be-câdur beni bu mertebe tazyîk ey gam

 Künc-i mey-hâne benüm hâtır-ı ahbâb senüŋ

3 Subha dek nâr-ı ciger-sûz-ı gamuŋla ey meh

Şem‘-veş girye benüm zevk-i şeker-hâb senüŋ

4 Koymaduŋ bir içecek diyü ko dahli zâhid

 Câm-ı sahbâ-yı safâ-bahş benüm âb senüŋ

5 Hem-çü pervâne neden SÂKIB-ı zâra hasedüŋ

 Bülbül ol şem‘ benümse gül-i şâd-âb senüŋ