Mef`ûlü mefâ`îlü mefâ`îlü fa`ûlün
1 Sâkîye dinüz bezme yine bâde getürsün
Bir bir hep unutduklarımuz yâda getürsün
2 Gül gibi sunup her birine câm-ı leb-â-leb
Bezm ehlini bülbül gibi feryâda getürsün
3 Mecnûn gibi yâbâna giden bü'l-heves-i `aşk
Hall itmedügi müşkîli üstâda getürsün
4 Cevr okları delsün dir ise bagrını âşık
Kirpiklerüni hâtır-ı nâ-şâda getürsün
5 Makta'da idüp medh ser-i zülfüni Yahyâ
Vasf-ı kad-i mevzûnunı bâlâda getürsün
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147