Mefâ`îlün Mefâ`îlün Mefâ`îlün Mefâ`îlün
 
1 Salar emvâcı bûs-ı pâyuña meftûn olur deryâ
 Seni zevrakla âgûşa çeker meşhûn olur deryâ
2 Anı tek reh-güzâruñ eyle eyyâm olsun olmasun
 Murâduñca akar her cânibe Ceyhûn olur deryâ
3 Degül emvâc-ı pür-çîn-i girih-gîri firâkuñdan
 Gider her yaña zencîrin sürür mecnûn olur deryâ
4 Girüp zevrakda bezm-i `işret itseñ nîm-mest olsañ
İrüp feyz-i nigâhuñ bâde-i gülgûn olur deryâ
5 Düşerse `aks-i dendân u lebüñ cânâ derûnına
 Leb-â-leb la`l-i rengîn ü dür-i meknûn olur deryâ
6 Sabâ bir şemme bûy-ı sünbülüñden itse dest-âvîz
 Gelür cûşa safâdan mevc ber-gerdûn olur deryâ
7 Yüzin sürdükçe hâk-i pâyuña teşrîf-i lutfuñdan
Dil-i Nâmî gibi biñ cân ile memnûn olur deryâ

Yard. Doç. Dr. Ahmet YENİKALE  AHMET NÂMÎ  DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ