650
Fe‘ilâtün/ Fe‘ilâtün/ Fe‘ilâtün/ Fe‘ilün
Goncalar başına dizdi gül-i handânları
Gülşeni tutsa n’ola bülbülüñ efgânları
Saña Servân ile Tebrîz’ini mülk-i ‘Acem’üñ
Baña Rûm illerinüñ husrev-i hûbânları
Bilmezin nic’ideyin kime şikâyet ideyin
Şâha ahvâlümi ‘arz itmedi derbânları
Kahveye çünki yasag eyledi şâh-ı devrân
Zurefâ kosalar elden n’ola fincânları
Ravziyâ bâde-sıfat kaldum ayakda n’ideyin
Pâdişeh bendesine itmedi ihsânları
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009