Şarâb-ı dil-küşâdan gördügüm zevk ü safâdır hep

Gazel

[21]

 [mefâ’îlün / mefâ’îlün / mefâ’îlün / mefâ’îlün]

 1 Şarâb-ı dil-küşâdan gördügüm zevk ü safâdır hep

 Fem-i mutribde gûş etdiklerim hüsn-i edâdır hep

 2 Sevip bir şûh-ı bâlâ-kad belâsın buldu dil ammâ

 Kimi gördümse bir öyle belâya mübtelâdır hep

 3 Hat u gîsûya denmek ‘anber-i sârâ vü müşg-i Çîn

 Kelâm-ı hâm u ta’bîr-i hatâ-ender-hatâdır hep

 4 İnanma sevdigim ‘arz-ı mahabbet etse de farzâ

 Güzeller gibi ahbâb-ı zamâne bî-vefâdır hep

 5 Ten-i hâkî tayanmaz rûzgâra gird-bâd-âsâ

 Cihânıñ Vehbiyâ âsâyişi mahv u hebâdır hep

Yrd. Doç. Dr. Ahmet YENİKALE, SÜNBÜL-ZÂDE VEHBÎ DÎVÂNI, Kahramanmaraş 2012

 Sünbülzade Vehbi Hayatı