ŞARKIYYÂT
mefâ’îlün mefâ’îlün mefâ’îlün mefâ’îlün
I
1. Güzeller içre mümtâz-i cihânsın ser-bülendümsin
2. Müsellem tarz ü tavrı dil-ber-i ‘âlem-pesendümsin
3. Gönül hâlin bilür şûh ü zarîf-i şeh-levendümsin
242
4. Benüm sen nûr-i çeşmüm yâr-i cânumsın efendimsin
II
1. Lebün emsem toyınca gözlerüm sürsem o ruhsâra
2. Safa virse şemîm-i zülf-i müşkînün dil-i zâra
3. Miyânun çeksem âgûşa sözüm bu olsa hemvâre
4. Benüm sen nûr-i çeşmüm yâr-i cânumsın efendimsin
III
1. Cemâlün ‘âlem-ârâ tal’atun bî-misl ü hemtâdur
2. Tenâsüb hep yerinde kadd ü kâmet de temâşâdur
3. Hayâlün dîdede her dem gamun kalbümde peydâdur
4. Benüm sen nûr-i çeşmüm yâr-i cânumsın efendimsin
IV
1. Amân bilmez mi çeşmün her nefesde câna kâr eyler
2. Tegâfüller kirişme gamzeler mestâne cünbişler
3. Ne var bir kerre de zâlim nigâh-i merhamet göster
4. Benüm sen nûr-i çeşmüm yâr-i cânumsın efendimsin
V
1. Visâl ümmîd ider hasret çeker Sâmî nice demdür
2. Gel ey âhû-nigâhum kaçma gönlüm sana mahremdür
3. Gözüm üzre yerün var cilvegâhun sahn-i sînemdür
4. Benüm sen nûr-i çeşmüm yâr-i cânumsın efendimsin
(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0