Seferber-i reh-i ‘aşkıñ niçe diyâra gider

Gazel

[55]

 [mefâ’ilün / fe’ilâtün / mefâ’ilün / fe’ilün]

 1 Seferber-i reh-i ‘aşkıñ niçe diyâra gider

 Güzel adıñ işidip tâ Güzelhisâr'a gider

 2 Gubâr-ı pâyıñ içün Isfahân'dadır nazarı

 Ümîd-i kand-i lebiñ ile Kandehâr'a gider

 3 Niçe fütâdeyi fitrâk-i nâza bend etmiş

 Niçün o şâh-süvârım yine şikâra gider

4 Çıkarsa hasret ile cânı ‘âşık-ı zârıñ

 Harîm-i cennet-i me’vâ-yı kûy-ı yâra gider

 5 Der-i cahîmi küşâd etdi ‘unf ile vâ’iz

 Bu âteş ile o da korkarım ki nâra gider

 6 Müsâ’id olsa da keştî-i bahtıña eyyâm

 Bu rûzgârı sakın sanma bir karâra gider

 7 Menâzil-i kamerîden mi hâne-i Vehbî

 Gehî gelirse de turmaz o mâh-pâre gider

Yrd. Doç. Dr. Ahmet YENİKALE, SÜNBÜL-ZÂDE VEHBÎ DÎVÂNI, Kahramanmaraş 2012

Sünbülzade Vehbi Hayatı