Seher-geh keşti-i şâhî hilâl-i ‘îd-i ekberdür

 

 

MALTA SEFERİNDE KEŞTÎ VASFINDA DİDÜGİ GAZELDÜR

 

[mefâ’îlün mefâ’îlün mefâ’îlün mefâ’îlün]

 

1 Seher-geh keşti-i şâhî hilâl-i ‘îd-i ekberdür

Tulû’ itdi sa’âdet matla’ından nûr-güsterdür

 

2 Livâ-yı sebz ile bahr üzre yürür Hızr-ı vakt olmış

Gazâya ‘azm ider yâ hod yeşil câmeyle Hayderdür

 

3 Yüce pervâz ider ‘ankâ-yı kâf-ı nusret olmışdur

Livâlar her yaŋadan gûyiyâ kim aŋa şeh-perdür

 

4 Çekilmiş yâ atılmış ok gibi der-dest-i kudretdür

Nişân ider dil-i a’dâtı ekser kasd-ı kâferdür

 

5 Uçar kuşlar hevâda aŋa hergiz hem-cenâh olmaz

Kaçan sür’atle reftâr eylese sad-pâ vü yek-perdür

 

6 Görinür regleri yir yir riyâzet-perver olmışdur

Gıdâsı âb-ı Hızr-âsâ egerçi bâd-ı sarsardır

 

7 Giderdi zulmet-i küfri cihânı eyledi rûşen

Ziyâ-bahş oldı nûr-ı Mustafâ öŋince rehberdür

 

8 ‘Adûyı Rahmiyâ bir lokma eyler çekse bir demde

Sürinür sînesi üstine gûyâ şekl-i ejderdür