Senüñ fülfül beñüñ varsa benüm dâg-ı siyâhum var

 

Mefâ‘îlün Mefâ‘îlün Mefâ‘îlün Mefâ‘îlün(1)

 

1. Senüñ fülfül beñüñ varsa benüm dâg-ı siyâhum var

 Senüñ sünbül saçuñ varsa benüm de dûd-ı âhum var

 

2. Senüñ başuñda miskîn sâye-bân var ise kâkülden

 Benüm de dûd-ı dilden âsumânî bâr-gâhum var

 

3. Senüñ başuñda ey meh gün gibi zer-efserüñ varsa

 Benüm de şu‘le-i nâr-ı mahabbetden külâhum var

 

4. Senüñ müjgân-ı çeşmüñden var ise leşkerüñ saf saf

 Benüm de yir yüzin tutar sirişkümden sipâhum var

 

5. Senüñ mânend-i mir’ât-ı mücellâ ‘ârızuñ varsa

 Benümde kûşe-i çeşm ile ırakdan nigâhum var

 

6 Senüñ kandan sirişküñ var ise ey dîde-i Emrî

 Benüm de sûz ile dilden gelür çok âh u vâhum var

 

 

Prof. Dr. Mehmet A. Yekta SARAÇ, EMRÎ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3144 KÜLTÜR ESERLERİ 427