Mef`ûlü mefâ`îlü mefâ`îlü fa`ûlün

 

 1 Sevdâ-yı ser-i zülfüni elden komam ey mâh

 Ser-rişte-i aşk eldedür el-minetü li'llâh

 2 `Aşkun nice düşvâr idügin her kişi bilmez

 Bir ben bilürin çekdigimi bir de bir Allâh

 3 Her gice neler çekdigimi künc-i belâda

 Dünyâlara her subh yayar âh-ı sehergâh

 4 Incinmez idüm çıkdugına hâne-i tenden

 Cân olsa eger nâvek-i cânân ile hem-râh

 5 Hem âh iderin kaçdugına benden o mâhun

 Hem havf iderin kim anı Yahyâ tuta ol âh

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147