Şol gelen dil-ber mi ya rûh-ı revânumdur benüm

258

- . - - / - . - - /- . - - /- .-

 

Şol gelen dil-ber mi ya rûh-ı revânumdur benüm

Leb mi şol hâtır soran ya yâr-ı cânumdur benüm

Sâkiyâ la’lün şarâb-ı erğavânumdur benüm

Gûşesi mey-hânenün eski mekânumdur benüm

Kasr-ı gamdur hâne-i dil nerdübân şimdi ana

Üstüh’ânlarla bu cism-i nâ-tüvânumdur benüm

Dâğ-ı hasret kim şehâ sînemde hûn-âlûdedür

Kanlar ağlar san bu çeşm-i hûn-feşânumdur benüm

Şevkden çekdüm elifle na’l şeklin sîneme

Râh-ı ‘ışk içinde çün tîr ü kemânumdur benüm

Çenge ‘âlemde Revânî dâyimâ baş egdüren

Bezm-i fürkatde olan savt u terânumdur benüm

 

 

Ziya Avşar, REVÂNÎ DÎVÂNI, KÜLTÜR VE TURİZM BAKANLIĞI YAYIMLARI ,ISBN 978-975-17-3352-8