Gazel
[50]
[mef’ûlü / fâ’ilâtü / mefâ’îlü / fâ’ilün]
1 Tâb-ı firâk u germî-i hicrân gelir geçer
Teb-lerzelerde nevbet-i hicrân gelir geçer
2 Mânend-i kârvân-ı müselsel-katâr-ı Çîn
Dilden hayâl-i kâkül-i cânân gelir geçer
3 Peykânı ber-güzâr kalır zahm-ı sînede
Her lahza tîr-i gamze-i fettân gelir geçer
4 Gördükde seyre geldigin âhû-nigehleriñ
Sandım ki fevc fevc gazâlân gelir geçer
5 Cûş u hurûş-ı fursata olma rübûde kim
Seyl-i bahâr gibi şitâbân gelir geçer
6 Düşme hevâ-yı rif’ate bu rûzgârda
Etmez karâr taht-ı Süleymân gelir geçer
7 Vehbî gibi edâsı hoş-âyende görmedik
Gerçi hezâr rind-i sühan-dân gelir geçer
Yrd. Doç. Dr. Ahmet YENİKALE, SÜNBÜL-ZÂDE VEHBÎ DÎVÂNI, Kahramanmaraş 2012