TAHMÎS
Gazel-i merhûm Sultân Süleymân Hân tahmîs-i Vecdî-i nâ-tüvân
Mefâ’îlün Mefâ’îlün Mefâ’îlün Mefâ’îlün
1 Gelüp nev-rûz-ı sultânî çemende şehr-yâr olsa
Giyüp la’l efserin lâle emîr-i tâcdâr olsa
Akup her sûya eşküm seyli kanlu cûybâr olsa
Zümürrüd nat’ döşense zemîne nev-bahâr olsa
Gülistân seyrine varsam bile ancak nigâr olsa
2 Çemende sündis-i ahdar döşense dehr bâgına
Şeh-i gül gelse konsa lâle-i alüñ otagına
İrişse bûy-ı ezhâr-ı bahârı cân dimâgına
Akup cûlar yüzin sürse dem-â-dem serv ayagına
Açılsa her taraf güller kamu kuşlar hezâr olsa
3 Seherden bâga ‘azm itsem bile ol mihr-i tâbende
Ben efgân eylesem bülbül gibi ol gül gibi hande
Terahhum eyleyüp şâhum dise hâlüñ nedür bende
Disem dil derdini bir bir oturup sahn-ı gülşende
Derûn-ı dilde her ne var açılsa âşkâr olsa
4 Niçe bir rûze-i hicr ile olam cânuma câbir
İrişsem ‘îd-i vasla olsa eyyâm-ı firâk âhir
Diseler vaktidür şimden girü gel bezme ol hâzır
Neşât esbâbını cümle müheyyâ itseler bir bir
Gehî nûş eylesem bâde gehî bûs u kenâr olsa
5 Bahâr irişse Vecdî gelse dehrüñ zevki eyyâmı
Gül-i ra’nâ açılsa bülbülüñ kalmasa ârâmı
Müheyyâ olsa meclis görse sâkî-i gül-endâmı
Mukarrer tevbeyi sıdı Muhibbî nûş idüp câmı
Şu göñlümden geçen gibi baña bir gül-’izâr olsa
Prof. Dr. Hasan KAVRUK, Dr. Bahir SELÇUK, FİLİBELİ VECDÎ ve DÎVÂN’I (METİN-DİZİN), © T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3366 ,MALATYA 2009