Tahmîs-i gazel-i Mîr Nedîm ez-tâze-gûyân-ı enderûn-ı hümâyûn

 

Tahmîs-i gazel-i Mîr Nedîm ez-tâze-gûyân-ı enderûn-ı hümâyûn

Fe’ilâtün/ Fe’ilâtün/ Fe’ilâtün/ Fe’ilün

 Remel: . . - -/ . . - -/ . . - -/ . . –

 

1 Ne hakâret kim ider ol şeh-i mümtâz bana

 Ben dirüm eyledi lutf itmege âgâz bana

 Hâk-i dergâhı olur mesned-i i’zâz bana

 “O hemân cevr idegörsün bu cefâ az bana

 Ben niyâz eylerem eylerse dahı nâz bana”

2 ‘Aşk vâ-reste-i kayd itdi dili bir demde

 Aramam neş’e-i bezm-i Cem'i câm-ı Cem'de

 Telh-kâm olalı hicrân ile künc-i gamda

 “İstemez kand-ı lebün tûti-i dil ‘âlemde

 Rû-nümâ olsa da ger âyine-i râz bana”

3 Diyemem binde birin derdümün eyvâh size

 Neler itdi neler ol şûh-ı cihân bendenize

 Geldi bin gûne felâket reh-i ‘aşkunda bize

 “Virmemiş ruhsat-ı hâb dîde-i gam-dîdemüze

 Öyle gamz eyledi ol gamze-i gammâz bana”

4 Yûsuf'un yâd iderek verd-i ruh-ı handânun

 Gül virür hâr-ı mugaylânı reh-i Ken’ân'un

 Hoş gelür cevri bile ‘âşıkına cânânun

 “Rûz u şeb tavr u edâsında çekersem anun

 Gelemez zerre kadar hâlet-i i’câz bana”

5 Enderûn-ı dilümi ana harîm itmegiçün

 Hâne-i dilde ana nâz u na’îm itmegiçün

 Gülsitân-ı dil-i Yâver'de mukîm itmegiçün

 “O kamer-çihreyi hem-bezm-i Nedîm itmegiçün

 Sînesin itdi felek hâsılı dem-sâz bana”

 

 

Dr. Kaplan ÜSTÜNER, ENDERUNLU HASAN YÂVER DİVAN [İnceleme-Metin-Çeviri-Dizin], https://ekitap.kulturturizm.gov.tr/Eklenti/10608,enderunlu-hasan-yaver-divanipdf.pdf?0