Tahmîs-i Gazel-i Sultân Murâd

 Fâ`ilâtün fâ`ilâtün fâ`ilâtün fâ`ilün

1 Mihr-i âlem-tâbdan güller çerâg-efrûzdur

 Nagmesi bülbüllerün ol şevk ile pür-sûzdur

 Künc-i halvetden bürûz eyle bu da bir rûzdur

 Ey gönül gül devridür vakt-i nev-i nev-rûzdur

 Cân bagışlar âdeme bu dem dem-i fîrûzdur

2 Rind-i bî-pervâ riyâ vü zühdü rû-pûş eylemez

 Kavl-i nâsih olsa dür gûşına mengûş eylemez

 Gül gibi sâgar gire destine kim nûş eylemez

 Vâ`iz-i şehrün kimesne pendini gûş eylemez

 `Ayş u nûşa es-salâdur bir mübârek rûzdur

3 Her makâmı gülşenün hoşdur nevâ-yı mürg ile

 Eglenür devrân nevâ-yı cân-fezâ-yı mürg ile

 Anmaz olur sâzı savt-ı pür-safâ-yı mürg ile

 Bâg pür-âvâzedür sıyt u sadâ-yı mürg ile

 Gûyiyâ her gûşede bir dürlü sâz u sözdür

4 `Aşık-ı şeydâya dil-ber iltifât eyler velî

 Cân mezâkına sözin kand-ı nebât eyler velî

 Şerbet-i la`lin meded-sâz-ı necât eyler velî

 Leblerinden mürde-dil kesb-i hayât eyler velî

 Neyleyim ammâ yine ol gamzeler dil-dûzdur

21

5 Aşk-ı Leylâ ile çekdi Kays envâ-ı mihen

 Gussa-i Şîrîn ile telh oldı ayş-ı Kûh-ken

 Söyleme dil virdügin dil-dâra Yahyâ gizle sen

 Bu Murâd'un mülket-i gönlün alup yagma iden

 Bir sitem-kâr-ı cefâ-cû dil-ber-i dil-sûzdur

Hasan KAVRUK,  ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞIhttps://ekitap.kulturturizm.gov.tr/Eklenti/

 

       Şeyhülislam Yahya Hayatı Divanı ve Şiirleri