Tahmîs-i Na‘t-ı Rûşenî
Fe‘ilâtün Fe‘ilâtün Fe‘ilâtün Fe‘ilün
Bir mehüñ bendesiyem sâye dahı olmaz eşi
Nûrınuñ zerresi olmaz bu cihânuñ güneşi
Kapladı pertev-i envâr-ı ruhuñ çâr u şeşi
Çün togup tutdı cihân nûrını hüsnüñ güneşi
Kim ola sevmeye bu vech ile sen mâhveşi
II
O kadar buldı suyın mu‘cize-i fahr-ı cihân
O kadar âb-ı ‘atâ itdi cihâna cereyân
Hep hayâtından elin yummış iken leşkeriyân
Parmaguñdan akıdup âb-ı revân-bahş revân
Niçe yüz biñ kişiden ref‘ idisersin ‘ataşı
III
Toldı âvâze-i i‘câzuñ ile çarh-ı kühen
Bildiler şânuñı ashâb-ı Buhâra vü Yemen
Degülem vasfuñ iden mülk-i fenâda bir ben
Türk ü Kürd ü ‘Acem ü Hind bilür bunı ki sen
Hâşimîsin ‘Arabîsin Medenîsin Kureşî
1V
Ne kadar ‘âsî vü mücrim ne kadar muktir ise
Ne kadar fâsık u fâcir ne kadar müksir ise
Ne kadar ma‘rifet-i hazretüñi münkir ise
Sen emîre kul olan her ne kadar müdbir ise
Bende-i mukbil olur misl-i Bilâl-i Habeşî
V
O zamân ki harem-i ‘izzete itdüñ seferi
Eyledüñ kurbgeh-i hazret-i Hakka güzeri
Virdi her zerre o demde saña bu hoş haberi
Sensin ol püşt ü penâh-ı melek ü ins ü peri
Enbiyânuñ güzeli sevgilüsi hûb u hoşı
….
Dr. İlyas YAZAR , K Â N Î D Î V Â N I, Ankara 2012