Tahmisler

5

Fâilâtün fâilâtün fâilâtün fâilün

 

1 Ben gibi üftâde olma sen dahi bir dâneye

 Büt-perest olma hemân geldinse bu büt-hâneye

 Genc isen de dil verip aldanma bu vîrâneye

 Hem inanma gönlüme hem gamze-i mestâneye

İ'timâd etme sakın bir meste bir dîvâneye

2 Yeğ gelir firkat dil-i mehcûra vuslat olmadan

 Girye vü zârî bana billah hoşdur gülmeden

 Hastayım olmam velî memnûn sıhhat bulmadan

 Hazzeder dil günde bin kerre gamınla ölmeden

Zevkin almış ol kadar cân vermenin cânâneye

3 Gelmedi bezme bu şeb ol şûh-ı bî-pervâ yine

 Oldu kimlerle acep hem-meclis-i sahbâ yine

 Öyle istiğnâ ederken bu dil-i şeydâ yine

 Sakınır bâd-ı sabâdan n'eylesin ammâ yine

Şem'-i bezm-efrûz sığmaz dâmen-i pervâneye

4 Anladım bu bender-i fânîde olmaz intifâ'

 Eylemem şimden girü endîşe-i mâl ü metâ'

 Ben ne gam ehl-i harâbâta edersem ittibâ'

 Biz der-i mey-hânede etdik gama sâkî vedâ'

Gerçi kim hem-râh idik varınca tâ mey-hâneye

5 Kâinâtı eyledim fikr ü teemmül bir zamân

 Bildim olmaz kimseye bâkî bu hestî-i cihân

 Mâsivâdan cümlesin terk eyledim ancak nihân

 Bir gönül kalmışdı esbâb-ı taallukdan hemân

Şimdi verdim onu da bir gözleri şâhâneye

6 Câm alıp Meşhûriyâ sâkî-i gül-endâm-ı mey

 Durma bahş etmekdedir olmuş yine eyyâm-ı mey

 Mevsim-i gül hem de devr-i sâgar-ı gül-fâm-ı mey

 Bir elinde dest-i sâkî bir elinde câm-ı mey

Nice el değsin Riyâzî subha-ı sad-dâneye

 

Yaşar AYDEMİR-Halil ÇELTİK, MEŞHURÎ DİVANI (Tenkitli Metin), T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3196 KÜLTÜR ESERLERİ, Ankara 2009