Taht-ı cefâya kim o şeh-i bî-vefâ çıkar
Cânum dem-i nezâre içün rû-nümâ çıkar
 
Gîsûları o beyt-i mu‘ammâdır olsa hal
Nâm-ı dil-i fütâde-i dâm-ı belâ çıkar
 
Âgûşa alsa cevher-i âyîne aksini
Âh [ü] füsûs her bün-i mûdan dü-tâ çıkar
 
İtsün şikest seng-i sitem kalbümüz dürüst
Her pâre çünki kâbil-i feyz-i likâ çıkar
 
Kalmaz ayakda pâyına bir kerre yüz süren
Dîhîm ile çıkarsa başa hâk-i pâ çıkar
 
Âmâc-ı tîr-i gamze iken çeşm-i dil yine
Her gördigine âyîne-veş âşinâ çıkar
 
Dâmân-ı hazm* çıkmaz idi dest-i hûşdan
Lîk ol perî çıkınca yüze hûş-rübâ çıkar
 
Gûyâ kemân-ebrû-yı dil-keş kemîndir
Andan hemîşe asker-i tîr-i kazâ çıkar
 
Ruhsat bulursa merdüm-i dîde açılmaga
Mâ-beynümüzde yâr ile çok mâcerâ çıkar
 
Âyîne iddi‘â-yı safâ itmesün tehî
Zîrâ görince nakşunı pür-müdde‘â çıkar
 
Bühtân-ı huşkdur sana zâhid bu hırkadan
Her kim dimiş olur ise reng-i riyâ çıkar
 
Te’sîr-i feyz-i sohbetümüz bundan it kıyâs
Kârûn girerse tekyemüze bî-nevâ çıkar
 
Dîvâr-ı şeş-cihâtı ider reşk-i âyine
Ol mâh-pâre seyre ki burka‘-güşâ çıkar
 
Ey dil görürsen ol şehi tîr ü kemân-bâz
Hâzır bulun ki şâyed elinden hatâ çıkar
 
Hem-kâra yok bahânemüz illâ ki hâmeler
Vaktinde ney-şekerle ney-i bûriyâ çıkar
 
Zîr-i külehde nâ’il olur devlete bu ser
Bir pûtedür küleh ki giren kîmyâ çıkar
 
Sâkıb bilür ne çekdügini kûy-ı yârda
Gûyâ garîb hissesine hep cefâ çıkar

Doç. Dr. AHMET ARI ,Mevlevîlikte Bir Hanedanlık Kurucusu SÂKIB DEDE VE DÎVÂNI, https://ekitap.kulturturizm.gov.tr/Eklenti/10645,sakibdededivanigirispdf.pdf?0