Târîh-i Cülûs-ı Meymenet-me'nûs Gâzî Hazret-i Sultân Abdülhamid

Hân İbn Sultân Gâzî Hazret-i Sultân Mahmûd Hân-ı Adlî der-Zımn-ı Sitâyiş-

i Û

1 Şükr ü sipâs-ı bî-kerân kim Hâlık-ı Hayy-ı Mecîd

Verdi cihâna başka şân ızhâr edip lutf-ı cedîd

2 Ma'dûm olup âsâr-ı gam ne gussa kaldı ne elem

Her ülkede oldu bu dem bir şâdî-i tâze bedîd

3 Revnak bulup çâr-cihât gülzâra döndü kâinât

Hiç kalmadı bî-vâye zât hep âlem oldu müstefîd

4 Geldi yeniden nev-bahâr arz eyledi ezhâr u bâr

Etdi donanma âşikâr bu şevk ile dehr-i saîd

5 Herkes bu dem olsa n'ola bülbül gibi nâme-serâ

Diller açıldı gûyiyâ mânend-i gonca-i verîd

6 Geldi safâlar fevc fevc oldu kederler herc ü merc

Dillerde şâdî ursa mevc şâyeste çün Bahr-ı Sefîd

7 Sanman görüp meh-pâreler yâ encüm ü seyyâreler

Almış ele çâr-pâreler raks etmede çarh-ı anîd

8 Kol kol gezer cânâneler hem âşık-ı dîvâneler

Na'ra urar mestâneler gamdan olup dûr u baîd

9 Buldu cihân ser-tâbe-pâ ârâyiş-i zevk ü safâ

Etse bu dem herkes sezâ her şeb kadr her gün bir îd

10 Olsa acep mi bahr u ber cennet gibi pür zîb ü fer

Âfâkı tutdu ser-te-ser âvâz-ı şâdî-i nevîd

 14

11 Yâ olmasın mı şâdmân sükkân-ı arz u âsumân

Kim oldu şâh-ı kâmrân sultân Han-ı Abdülmecîd

12 Oldu imâmu'l-müslimîn zıll-ı Hudâ hâmî-i dîn

Etdi meserret mü'minîn kahr oldu küffâr-ı pelîd

13 Evrengi teşrîf eyledi her kalbi te'lîf eyledi

 Dünyâyı taltîf eyledi ibrâz edip hulk-ı hamîd

14 Hem pâdişâh-ı nev-civân hem şehriyâr-ı Cem-nişân

Şâyeste şâhân-ı cihân dergâhına olsa abîd

15 Ser-pîşesi insâf u dâd endîşesi celb-i fuâd

Etmiş ne var hem i'tiyâd şâhâne evzâ'-ı güzîd

16 Gâlib atâda Hâtem'e fâik vegâda Rüstem'e

 Gelmiş değildir âleme bir böyle şâh-ı bî-nedîd

17 Şân u şükûh-ı şevketi kahr u celâl ü satveti

Esbâb-ı fevz ü nusreti hakk eylemiş onda nezîd

18 Vermiş mi bir şâh-ı selef dehre aceb böyle şeref

Görmüş mü çeşm-i nüh-sadef zâtı gibi dürr-i ferîd

19 Devrinde İskender nedir hem Kisrâ vü Kayser nedir

Yanında Ristolar nedir kim eyleye re'y-i sedîd

20 Şâhân-ı devrin a'zamı Osmâniyânın ekremi

Meydân-ı rezmin Rüstem'i hakân-ı devrân-ı harîd

…………

27 Câh u celâl ü şevketi dârât u fer ü haşmeti

İkbâl-i ömr ü devleti günden güne olsun mezîd

28 Feth-i cihâna ser-te-ser etdikce şevketle sefer

Destinde tevfîk ü zafer olsun inhitâr u kilîd

29 Âlem olup devrinde hep bî-jeng ü endûh u ta'b

 Her rûz-ı şâdî vü tarab bir yıl gibi olsun medîd

30 Neşreyleyip ahkâmını dehre yürütsün nâmını

Dünyâdan alsın kâmını ber-vefk-i dilhâh u ümîd

31 Târîhi çün dürr-i semîn menkûtıla oldu güzîn

 Fart-ı şerefle oldu dîn Sultânı Hân Abdülmecîd

(Sene 1255/1839)

 

Yaşar AYDEMİR-Halil ÇELTİK, MEŞHURÎ DİVANI (Tenkitli Metin), T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3196 KÜLTÜR ESERLERİ, Ankara 2009