Târîh-i Feth-i Belde-i Tiflîs

 

Târîh-i Feth-i Belde-i Tiflîs

 

Zamân-i Sultân Ahmed Hân

 

 fâ’ilâtün fâ’ilâtün fâ’ilâtün fâ’ilün

 1. Pâdşâh-i rub’-i meskûn şehryâr-i şark ü garb

 Hazret-i sultân Ahmed hân mülûkün erşedi

 2. Fenn-i isti’dâdda ol feylesûf-i kâmilün

 Bû ‘Alîdür mekteb-i zihninde tıfl-i ebcedi

 3. Hükm-rân-i Rum ü Rey sultân-i A’câm ü ‘Arab

 Zât-i zî-şânıyla fahr eyler hilâfet mesnedi

 4. Râfıziyle Gürci hınzîri hıyânet eyleyüp

 Hayr ü şerri bilmeyüp fehm itmedi nîk ü bedi

 5. Hazret-i sultân Selîm hân ü Süleymândan beri

 Şîrvân iklîmine kimse ta’addî itmedi

 6. Gayret itdi ol şehenşâh-i Süleymân-iktidâr

 Mâlikü'l-mülke tazarru’ kıldı nusret istedi

 7. Zîver-i hüsn-i kabûl oldı du’âsı ‘âkıbet

 İrdi dergâh-i İlâhîde husûle maksadı

 8. Bâreka'llâh kuvvet-i baht ile ol sultân-i dîn

 Himmet itdi rûh-i ecdâdını ihyâ eyledi

 9. Böyle bir ‘ankâ-yi Kâf-i himmetün çok mı eger

 Kabza-i teshîre alsa rub’-i meskûnı yedi

 10. Mihr ü mâh oldukça pertev-bahş-i eflâk ü zemîn

 Tev’em olsun nûr-i tevfîk ile baht-i es’adi

198

 11. Çâr-yâr imdâd idüp Sâmî didüm târîhini

 Belde-i Tiflîsi aldı emr-i sultân Ahmedî

 sene 1135

(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ  DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0