Târîh-i Hatt-i Muhammed Kethudâ-yi İbrâhîm Paşa

 

 

Târîh-i Hatt-i Muhammed Kethudâ-yi İbrâhîm Paşa

 

 mefâ’îlün mefâ’îlün mefâ’îlün mefâ’îlün

 

 1. Semiyy-i fahr-i ‘âlem hazret-i aga-yi zî-şân kim

 Odur ‘izzetle hâlâ kethudâ-yi sadr-i ‘âlî-câh

 2. Muhammed nâm-i pâki bir vücûd-i muhteremdür kim

 Cihân evsâf-i zâtın eylemişdür zîver-i efvâh

 3. Kerîmü't-tab’-i pür-himmet hayır-hâh-i velî-ni’met

 Güzîn-i fırka-i a’yân-i devlet mefhar-i eşbâh

 4. Halûk ü dil-nevâz ü merhamet-sâz ü kerem-perver

 Melek-haslet sütûde-menkabet sâhib-i dil-âgâh

 5. İdüp zâtında isti’dâd-i küllî oldugın idrâk

 Vezîr-i a’zam İbrâhîm paşa-yi felek-dergâh

 6. Hazînedâr ü dâmâd eylemişdi kendüye evvel

 Kemâl-i sıdk ile ma’lûmı idi hidmeti her gâh

 7. Karîn-i lutf ü cûdı eyleyüp olmışdı hemvâre

 Hazarda ‘abd-i makbûli seferde bende-i hem-râh

 8. Bu def’a dahı itdi kethudâ-yi devlet ü ikbâl

 Dahı a’lâ merâtible mükerrem eyleye Allâh

 9. Boyınca hil’atidür kethudâlık çünki olmışdı

 Mukaddemki libâsı kadd-i isti’dâdına kûtâh

180

 10. İdüp irsâl-i lihye rûz-i nasbında sa’âdetle

 Cemâli mushafında hüsn-i hatm oldı bi-hamdi'llâh

 11. ‘İzârı oldı şekl-i müstedîr-i vech-i pâkiyle

 Kenâr-i ebrde mihr ü miyân-i hâlede çün mâh

 12. Cenâb-i Hak te’âlâ Sâmiyâ ‘ömrin füzûn itsün

 Safâlarla ola ikbâlde ber-vefk-i hâtır-hâh

 13. Kalem ref’-i ser-engüşt-i işâret itdi târîhe

 Hat-i nev oldı levh-i hüsne gûyâ medd-i bismi'llâh

 sene 1131

 

(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ  DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0