Târîh-i Vilâdet-i Şeh-zâde Sultân Selîm İbni Sultân Ahmed Hân

 

Târîh-i Vilâdet-i Şeh-zâde Sultân Selîm

İbni Sultân Ahmed Hân

 

 fâ’ilâtün fâ’ilâtün fâ’ilâtün fâ’ilün

 1. Hamdüli'llâh itdi lutf-i hâlik-i cân-âferîn

 ‘Âlem-i ma’nâdan izhâr-i füyûzât-i ‘amîm

 

 2. Âşkâr oldı verâ’-i perde-i tahkîkden

 Levh-i mir’âtü’s-safâda pertev-i sun’-i kadîm

 3. Tengnâ-yi dilde gayrı kalmadı cây-i gumûm

 K'eyledi füshat-serây-i dehri pür şevk-i ‘azîm

 4. Âsmân encümle vakf-i hande-i dendân-nümâ

 Mihr ü meh ‘arz itmede yüz şevk ile rûy-i besîm

 5. Nahl-i devletde açıldı bir gül-i ra’nâ yine

 Esdi gülzâr-i pür-ezhâr-i meşiyyetden nesîm

 6. Bezm-i hestîde olup ser-şîşe-pîrâ-yi zuhûr

 İtdi ser-tâ-ser meşâm-i ‘âleme neşr-i şemîm

 7. Müjdeler âfâka çerhe dîdeler rûşen henûz

 Kim sipihr-i saltanatdan togdı bir nûr-i cesîm

 8. Tâcdâr-i saltanat şâhenşeh-i ‘âlî-nijâd

 Ma’delet-mu’tâd ü Kisrâ-dâd ü İskender-nedîm

 9. Pâdşâh-i muttakî icrâ-kun-i emr-i İlâh

 Bende-i fermân-ber-i âyât-i Kur’ân-i Kerîm

178

 10. Câ-nişîn-i Mustafâ sultân-i zıllu'llâh kim

 Meş’al-i hükmiyle rûşendür tarîk-i müstakîm

 11. Re’y ü tedbîri muvâfıkdur kitâb ü sünnete

 Tarz ü tavrı dâ’imâ ber-mûcib-i şer’-i kavîm

 12. Mesned-ârâ-yi hilâfet âb-i rûy-i saltanat

 Rûh-bahş-i dîn ü devlet sâhib-i tab’-i selîm

 13. Kâr-dân-i bî-mu’âdil ‘âdil ü pâkîze-dil

 Dâver-i kâmil hıdîv-i ‘âkil-i şâh-i halîm

 

14. Hazret-i hân Ahmed-i gâzî ki ihsân eyledi

 Ana bir şeh-zâde-i sa’d-ahteri hayy ü kadîm

 15. Ma’den-i sulb-i şehenşâhîden oldı âşkâr

 Gevher-i tâbende-i devlet ki mânendi ‘adîm

 16. Makdemiyle tâze cân buldı sipihr-i köhne-sâl

 Kesb-i rûh itse n'ola bu feyz ile ‘azm-i remîm

 17. Olsa ser-tâc-i selâtîn-i zamân şâyestedür

 Ol yegâne gevherün lâlâsıdur hân-i Kırım

 18. San derûn-i hâlede mâh-i cihân-ârâ olur

 Cilvegâh-i cismi oldukça murassa’ mehd-i sîm

 19. Yâ İlâhî serv-i zâtı görmeyüp bâd-i hazân

 Tûl-i ‘ömr ile ola perverde-i nâz ü na’îm

 20. Kıl habîbün hürmetine da’vetüm yâ Rab kabûl

 Eylerüm ma’lûm-i zâtundur niyâzı ‘an-samîm

 21. Eyle sultân Ahmedi şeh-zâdegânıyla ma’an

 Taht-i devletde kemâl-i pîr eyâ Rabbe'r-rahîm

 179

 22. Lafz ü ma’nâ ile Sâmî bende târîhin didi

 Geldi kevne bin yüz otuzda cenâb-i şeh Selîm

 sene 1130

 

(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ  DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0