Taşa çaldum başumı yoluñda ey hânum Kaya

 

Fâ‘ilâtün/ Fâ‘ilâtün/ Fâ‘ilâtün/ Fâ‘ilün

 

Taşa çaldum başumı yoluñda ey hânum Kaya

Başa çıkmadum gam-ı ‘ışkuñla sultânum Kaya

 

Seng-i mermerden midür kalbüñ ki te’sîr eylemez

Nerm ider pûlâdı gerçi âh u efgânum Kaya

 

Ârzû-yı kuhl-ı hâk-i pâyüñ ile dem-be-dem

Kanlar aglar dâ'imâ bu çeşm-i giryânum Kaya

 

Cûy-ı eşküm taşdı tutdı ser-be-ser dünyâ yüzin

Korkum oldur kûyuñı gark eyleye cânum Kaya

 

Küfr-i zülfüñ fikridür Ravzî’nüñ alan ‘aklını

Anı mahrûm itme gel ey dînüm îmânum Kaya

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009