Taştîr-i Gazel-i Nedîm-i Kadîm
15.06.2017
Taştîr-i Gazel-i Nedîm-i Kadîm
I
1. Derdin nedir gönül sana bir hâlet olmasın
2. Bîmâr eden bu gûne seni râhat olmasın
3. Bizden tesettür etme abes külfet olmasın
4. Bî-câ tabîbe varmağa hiç hâcet olmasın
5. Sad el-hazer ki sevdiğin ol âfet olmasın
223
II
1. Gâhî kirişme gâh tegâfül gehî itâb
2. Tarf-ı küleh şikeste vü ebrûda pîç ü tâb
3. Baksan egerçi elde değil sâgar-ı şarâb
4. Ammâ henüz gamze ser-efken nigeh harâb
5. Ol mest-i nâz mest-i mey-i nahvet olmasın
III
1. Dünyâya oldu velvele-endâz-ı rest-hîz
2. Kad çekdi servler gibi âh-ı şerâre-rîz
3. Gül-nahle oldu nahveti sermâye-i sitîz
4. Devşirdi dâmenin yine şimşâd-ı tünd ü tîz
5. Gülzâra azm eden o sehî-kâmet olmasın
IV
1. Bîgâne-meşrebâ bize tâ key tegâfülün
2. Ey nahl-ı nâz yok mu bu hâke temâyülün
3. Açılmaz ise nâhun-ı âhımla kâkülün
4. Yoğ ise bir kelâma bizimle tahammülün
5. Bir âşinâ nigâha da mı ruhsat olmasın
V
1. Ey andelîb nâle-i âteş-feşânı ko
2. Tâ böyle hiffet eyleme âh u figânı ko
3. Terk eyle bî-edebliği eşk-i revânı ko
4. Şeb-nem misâl sen dahı bâr-ı girânı ko
5. Terdir mizâc-ı nâzük-i gül sıklet olmasın
VI
1. Gelmez o şûh meclise ağyâr gelmese
2. Memnûn idik bu kendüye de bâr gelmese
3. Bir pâre havf-ı serdî-i bâzâr gelmese
4. Lutf eylemek değil hat-ı ruhsâr gelmese
5. İster ki arz-ı hâle bile fursat olmasın
VII
1. Merhem-pezîr olmadı zahmım benim Mesîh
2. Teng oldu cism ü câna bu nüh kubbe-i fesîh
3. Vermezse ger şifâ şefe-i dil-ber-i melîh
4. Bihbûd olur mu değme nemekden dil-i cerîh
224
5. Etme telef ilâcını gel zahmet olmasın
VIII
1. Şâyed eser ede nefes-i âteşîni hayf
2. Olmaz enîn-ı âşıka zîrâ metâ vü keyf
3. Hem-mahlasım ki nazm ile etmişdi sell-i seyf
4. Bu mısra‘ı benim çün okurmuş şitâ vü sayf
5. Söylen Nedîm-i zâr ile germ-ülfet olmasın
MACİT, Muhsin, Nedîm Divanı, Akçağ Yayınları, Ankara 1997.
https://ekitap.kulturturizm.gov.tr/Eklenti/10635,nedim-divanipdf.pdf?0
