Tefâhur itmege lâyık nijâdımuz yokdur
14.04.2016
Mefâ‘ilün Fe‘ilâtün Mefâ‘ilün Fe‘ilün
1.Tefâhur itmege lâyık nijâdımuz yokdur
İzâfet-i suhane i‘tiyâdımuz yokdur
2. Arada biz hele şaşduk irâde mahv oldı
Murâdumuz diyecek bir murâdumuz yokdur
3. Vücûd ararsañ efendi vücûdsuzluktur
Vücûd-ı ‘ârizîye istinâdımuz yokdur
4. Ne nîk-nâmlıgımuz var ne pek de bed-nâmuz
Tahallus eyleyecek rütbe adımuz yokdur
5.Mu‘ârizât-ı suverle olındı sulh-ı ebed
Bizüm bu ma‘rekelerde cihâdımuz yokdur
6.Reh-i vefâda ebed zikr ü fikrimüz sensin
Cerâb-ı dilde bizüm gayrı zâdımuz yokdur
7. Beri o rütbeyüz esbâbdan ki ey Kânî
Tevekkül ile dahı ittihâdımuz yokdur
Dr. İlyas YAZAR , K Â N Î D Î V Â N I, Ankara 2012
0
0
Yorum Yapmak için Kayıt Olun veya Giriş Yapın