Der-sitâyiş-i Hazret-i Çelebi Argûn kuddise sırrahû
 
TERCÎ'-İ BEND
Fâ'ilâtün Fâ'ilatün Fâ'ilatün Fâ'ilün
 
I.
 
Tâc-dâr-ı mülk-i bâl ü 'ârif-i sâhib-kemâl
Şeh-süvâr-ı saff-ı hâl ü vâkıf-ı sırr-ı me'âl
Râyet-efrâz-ı kerâmet dâr-ı fermâ-yı nevâl
Mesned-ârâ-yı velâyet-zîb-i mi'râc-ı hayâl
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
 
II
Zât-ı pâki gevher-i yektâ-yı deryâ-yı şu'ûn
Sîne çâk-ı hüsn-i vasfı kilk-i tab'-ı zû-fünûn
Sâyesi ser-mâye-i âsâyiş-i ehl-i derûn
Hâk-ı der-gâhında itmez nakş-ı yâ raybe'l-menûn
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
III
Lehce-i lutf-ı beyân-ı tûtî-i hikmet-serâ
Beçce-i kuds âşiyân-ı bülbül-i cennet-serâ
Çend-rûz olsa ne gam köhne-kafes tahte's-serâ
Mehçe-i a'lâm-ı sırrı kim ola fevka'l-verâ
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
IV
Nev-be-nev ihsânı dervîşânı memnûn itmede
İştiyâkı dem-be-dem hullânı mecnûn itmede
Hüsn-i hulkı yek-be-yek ihvânı meftûn itmede
Zikr-i hayrı ser-be-ser ekvânı meşhûn itmede
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
V
Olmasaydı âdeme âyîne-dâr ger şems-i dîn
Zerre-vâr olmazdı meczûbı 'ukûl-ı mürşidîn
Pertev-i çeşm ü çerâğ-ı sâdırîn ü vâridîn
'Av 'av-ı sekdür ana nisbetle harf-i hâsidîn
Kutb-ı 'âlem gavs-ı âdem mazhar-ı nûr-ı cemâ
Hazret-i Sultân Argûn kurretü'l-'ayn-ı celâl
VI
Sırr-ı İlyâs olduğında yok ser-i mû irtiyâb
Himmeti virse n'ola rûy-ı zemîne âb u tâb
Kanda kim bir derd-mend olsa esîr-i pîç-tâb
Cânib-i rûh-ı cenâbından görür bin feth-i bâb
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
VII
Ol şeh-i gaybî haşemdür çün velî ibnü'l-velî
'Asrınun olsa 'aceb mi ser-firâz u ekmeli
Anda cem' olmış ma'ârif âhiri vü evveli
Âhir-i sâbık ki dirler şübhesiz oldur belî
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
VIII
Dâmeni üftâde-i pây-ı ümîde dest-gîr
Dest-i sûd-ı hırz-ı cân-ı müstemend-i müstecir
Mûmyâ-yı iltifâtı çâre-i kalb-i kesîr
Kimyâ-yı hâk-i pâyi mâye-i dest-i fakîr
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
IX
Zânû-yı teslîmi besdür serverân-ı himmete
N'eylesünler ser-fürû-yı âsitân-ı devlete
Cümle cân u baş ile âmâde vakt-i fırsata
Muntazırdur her biri nâ-geh kabûl-i hıdmete
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
X
Eymen-âbâd-ı tecellî tab'-ı sâf-ı hürremi
Teşne-i âb-ı bekâya Hızr-ı zinde her-demi
Gûşe-i vahdetde sağrak-ı fenâdur hem-demi
Nev-'arûs-ı bahta nâz eyler kemîne mahremi
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
XI
Fâtih-i genc-i işâret kâşif-i sırr-ı zamîr
Tâli'-i evc-i beşâret mürşid-i bernâ vü pîr
Fi'l ü kavli dil-nişîn ü vaz' u tavrı dil-pezîr
Şîve-i nâdîdesi teshîr-i dilde bî-nâzîr
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
XII
Zâhirâ olmış zemîn-i türbesinde münzevî
Bâtınında enfüs ü âfâk lîkin müntavî
Meşrebinden teşne-diller dâ'im olsun mürtevî
Kim odur hâlâ veliyyü'l-'ahd-ı pîr-i mevlevî
Kutb-ı 'âlem gavs-ı âdem mazhar-ı nûr-ı cemâl
Hazret-i Sultân Argûn kurretü'l-'ayn-ı celâl
……………