Terkib-i Bend Der-Rûm İli Kenefine
22.01.2018Terkib-i Bend Der-Rûm İli Kenefine
--. / -.-. / .--. / -.-
I
1.Yâ Rab ne tîre-kevkeb olur bu Sa‘îd-i zâr
Mülk-i cihânda bulmadı yek zerre i‘tibâr
2.Sûret-nümâ-yı mahzenü’l-hüsâm iken dili
İdbârı kîr-gûn ile olmakda pür-gubâr
3.Jengâr-ı ye’si kalmadı enîne-i dilüñ
Görünmez oldı şâhid-i ümmîd-i nev-bahâr
10b.
4.Hırmen-ı dilde nüsha-i maksûda başladı
Pergâr-ı dûn-ı tâli‘ ile çizmege kenâr
5.Dâr-ı cihânda kilk-i senc-gûsı hem-demi
Ma‘nâ-yı bikr-i şâhidi mi şi‘r-i âb-dâr
6.Çekdi ‘arûsı dûnuñ ey çarh sîneye
Taht-ı safâda bir süri nâ-ehl nâ-be-kâr
7.İkbâl eyle ehl-i dile ey felek yeter
Hod-bîn hod-furûşları eyle zâr zâr
8. İtdüñ Sa‘îde zilleti künc mülk-i Rûmı taht
Ey baht-ı saht reşk ile ol sen de laht laht
II
1.Yâ Rab ne şûre- zâr olup gam-zidâ-yı Rûm
Elde girye vü gam bitirür nâ-sezâ-yı Rûm
2.İkbâli kalbe gelse hemân lâ-yafnâ olur
Ehvel bakar meger ki görenler safâ-yı Rûm
3.‘İlm ehli nâ-bedîd ma‘ârifse nâ-şenîd
A‘yânı hep pelîd budur mâcerâ-yı Rûm
4.İşbu ‘aceb ki sâlik-i merd-i Hüdâ ‘adîm
Her kûçede nişeste iken evliyâ-yı Rûm
5.Bir sîm-ten de yok ki göñül kâm ala biraz
‘Ankâ-yı kûh-ı Kâf gibi meh-likâ-yı Rûm
6.Gördükce âdemi dem –i inkârdan gelür
Bî-gâne tarz olur reviş-âşinâ-yı Rûm
7.Bir dem halâs eylese lutfıyla Hak bizi
Tenden degül ki cânuma geçdi cefâ-yı Rûm
8. Yâ Rab halâs eyle beni Rûm-ı şûmdan
Ya‘ni ‘azâb-ı sûziş-i nâr-ı gumûmdan
III
1.Zann itme Rûm milketi cây-ı makar bize
Her dem güzâr-ı ‘ömr gazab-ı sakar bize
2.İkbâl ile dil oldı hemân taht-ı ye’s-i şâh
Geldi hediyye zer-ger-i gamdan kemer bize
3.İtdüm hakîkat ile nazar gördüm ehl-i Rûm
Tündî-i saht-ı Rûm ile ‘aynı bakar bize
4.Gam gûşesinde yâd-ı leb-i dil-berân ile
Vişn’âb-ı keyf çekmege hûn-ı ciger bize
5.İtdüm hücûm-i kâfir –i gamdan güzîr içün
Rûm içre hasb-ı hâlüm iden mukarrer bize
6.Bir dem murâdum üzre dönüp çarh-ı tîz-rev
Olsa zemîn –i mülk-i Kırım’a sefer bize
7.Mihmân-ı keyf dilde o demde konuk olup
Virmezdi hüzn-i kalb-i gubâr keder bize
8. Yâ Rab halâs eyle bu Rûm ilinden meded
Başumdan aşdı geçer gamum itdi cezr ü med
11a.
IV
1.Dâd ey sipihr yok mı bu zulmüñ nihâyeti
Mevcûd olan cihânda bulur elbet gâyeti
2.İrdi murâda bir iki nâ-pâk nâ-sezâ
İtdüñ gürûh-ı ehl-i dile sen hıyâneti
3.Merdûd eyle anları idbâr-ı saht ile
Teslîm eyle bize de bir kez emâneti
4.Cân u dil ile sıdkıla ihlâsıla girüp
Râh-ı Hüdâda görüncedür istikâmeti
5.Birkaç zamân da sîne-i mecrûha merhem it
Çerkes nigârı lâle-ruhı servi kâmeti
6.İtsek edâ-yı ni‘met-i Mevlâyı şükr ile
Tayy-ı mekân eyleyügörsek kerâmeti
7.Dünyâda dâdum almaz isem senden ey felek
Dîvân-ı Hakda eylerem âhir şikâyeti
8. Ey baht sen de hâb-ı girândan açup gözin
Gör kim safâ-yı dûn u denî dutdı yir yüzin
V
Gör Rûm-ı şûmı dil-berinüñ hîç edâsı yok
Gül nâ-guşîde bülbülinüñ de nevâsı yok
Her şûhı mihr-bânı erâzil me‘âb ile
‘Arz-ı şikeste-tâze civânuñ kıyâsı yok
Secde ider yüz üstine der-kâr olanlara
Yıllar geçer ki ‘âşıkına merhabâsı yok
Taz‘yîf eyledükce erâzil ‘aceb bu kim
Oldukca bâz –gûn görinürde hayâsı yok
Her demde sürme çekdürür agyâr-ı dûnına
Sâhib hayâ-yı ‘âşıkına tûtiyâsı yok
Her demde esb-yâri egerler biner gider
Püşt-i safâsı hâne-i menzil kirâsı yok
Bâg-ı visâle kerre-i vaslı salar hemân
Küstâh tab‘-ı muglim içün de cezâsı yok
Bir yirde böyle dil-bere ne mâcerâ ola
Hayretle hûn-ı ‘âşık içün Kerbelâ ola30
VI
Bir şeb ki çarh kurmış idi hayme-i nevi
Pîrûze reng kubbesi pervâzı âteşî
Nûr-ı dü-çeşm-i ‘âlemi hâb-ı girân olup
Bâz-ı şu‘ûrı tende uçurmışdı her biri
Rûh-ı revân-ı ‘âlem-i lâhûtı seyr idüp
Gördüm serây-ı kudsde bir pîr-i rûşeni
Didüm ki hall-ı ‘ıkd-ı şu‘ûr eyle lutf idüp
Derd-i derûnda muzmer olan dâg-ı müşkili
11b.
İdbâr tutdı yüz bu Sa‘âdet ocagına
Anlar şarâb-ı devletile mest her biri
Didüm ki vaz‘-ı dehr geçüpdür derûnuma
İtdüm sihâm-ı ta‘ne nişân çarh-ı kec-revi
Didi ki geldi hayr sa‘âdet ocagına
Zînhâr itme hikmet-i Hakdan şikâyeti
Başla du‘âya çarh ile itme mükâleme
Yüz tut niyâz-ı tâm ile Vehhâb-ı ‘âleme
VII
Bahr-ı dalâlet içre koma yâ Hüdâ bizi
Tîr-i belâya sabra kıl ‘ayn-ı rızâ bizi
İtme mürîd tekye-i pîr-i mecâziye
‘Aşk -ı hakîki râhına kıl mühtedâ bizi
Döndür kelâm-ı kec-rev-i nâ-mezâkumuzı
Tevhîd-i zikrüñ itmege subh u mesâ bizi
Yâ Rab be-hakk-ı kavim-i şehîd-i Kerbelâ
Yâ Rab be-hakk-ı fahr-ı cihân Mustafâ bizi
Künc-i ferâgat içre zelîl itme Rûmda
Taht-ı Selîm vârisi kıl sen şehâ bizi
Kâm-ı ‘arûs-ı tahtı bize nâm-zâd idüp
Mahtûbe –i şerîfîye irgür Hüdâ bizi
Her demde ‘ayş ‘işret –i zevk safâda kıl
İki cihânda lutf ile sâhib-nevâ bizi
Şâd eyle bu Sa‘îd kuluñ lutfa mazhar it
İhsân ile mülk-i Kırım içre ser-ver it
Saadet Karaköse, : Sa’id Giray Dîvânı, : © T.C. Kültür ve Turizm Bakanlığı Kütüphaneler ve Yayımlar Genel Müdürlüğü,2017 ISBN: 978-975-17-3636
0
0
Yorum Yapmak için Kayıt Olun veya Giriş Yapın