Tevhîd-i zâtıñ bahrına ‘aşkıla talmayan bilmez

 

Tevhîd-i zâtıñ bahrına ‘aşkıla talmayan bilmez
Ledünnî bahrınıñ dürrin sarrâfı olmayan bilmez

‘Âşıkları hayrân iden tevhîd-i zât envârıdur
Cân gözinden mâsivânıñ tozını silmeyen bilmez

Muhammed nûrını görmek men ‘araf sırrıdur bildüm
Bir kâmil eriñ himmeti burhânı olmayan bilmez

Erenleriñ sözi hakdur inanmayan münâfıkdur
Zann u gümânı terk idüp sıdkıla gelmeyen bilmez

Ma‘ânî bahrınıñ vasfın Sinân Ümmî ider ızhâr
Nişân-ı lâ-mekândan bir nişânı olmayan bilmez

Ümmi Sinan  TÜM Şiirleri

ÜMMİ SİNAN ( ELMALILI - 17. YY ) HAYATI VE ŞAİRLİĞİ