TEVHİD Kasîde ender Tevhîd-i Bârî Te’âlâ
12.10.20172. TEVHİD
1
Kasîde ender Tevhîd-i Bârî Te’âlâ
. - . - / . . - - / . - . - / . . –
Cilâ-yı kalb-i cihân lâ-ilâhe illa’llâh
Safâ-yı behcet-i cân lâ-ilâhe illa’llâh
Lisân-ı hâl ile söyler rumûz-ı vahdetden
Kaçan ki aça dehân lâ-ilâhe illa’llâh
3 Felekden itdi yüce bârgâhınun çetrin
Ne yirde tutdı mekân lâ-ilâhe illa’llâh
Ne denlü var ise esrâr-ı ‘âlem-i gaybî
Cihânda itdi ‘ayân lâ-ilâhe illa’llâh
Ne hoş çıkardı mu’ammâ-yı beyt-i dünyâyı
Lüğaz-güşâ-yı cihân lâ-ilâhe illa’llâh
6 İçürdi âb-ı zülâl-i bekâyı teşnelere
Ne yirde k’oldı revân lâ-ilâhe illa’llâh
Safâ-yı meclis-i kurb u cemâl-i şâhid-i kuds
Huzûr-ı ehl-i dilân lâ-ilâhe illa’llâh
Mütûn-ı ‘âlem-i kudsîye hoş muhakkıkdur
Kim itdi şerh ü beyân lâ-ilâhe illa’llâh
9 Sürûr-bahş-ı zemâne mübeşşir-i ‘âlem
Hubûr-ı hûr-ı cinân lâ-ilâhe illa’llâh
Görindi Ka’be-i maksûd gün gibi rûşen
Çün oldı nûr-feşân lâ-ilâhe illa’llâh
Bekâ-yı devlet-i dünyâ vü ‘izzet-i ‘ukbâ
Hisâr-ı emn ü emân lâ-ilâhe illa’llâh
12 Ne pâdişâhdur ol kim berât-ı hükminde
Yazıldı ana nişân lâ-ilâhe illa’llâh
Semend-i ‘izzete oldı süvâr ‘âlemde
Kime ki sundı ‘inân lâ-ilâhe illa’llâh
Giderdi şübhelerini zemâne gönlinden
Komadı hîç gümân lâ-ilâhe illa’llâh
15 Ziyâ-yı mihr-i şerî’at şu’â’-ı şems-i yakîn
Safâ-yı pîr ü cüvân lâ-ilâhe illa’llâh
Şu denlü eyledi hoş-hâl halk-ı dünyâyı
Kim oldı vird-i zebân lâ-ilâhe illa’llâh
Toyurdı ni’met-i Hakka iki cihân halkın
Bu nice sufre-i hân lâ-ilâhe illa’llâh
18 Revânî iki cihânı ne var ğanî kılsa
Çün açdı genc-i nihân lâ-ilâhe illa’llâh
Mahabbetini gönülden gidermesün Allâh
Çün oldı dilde revân lâ-ilâhe illa’llâh
Ziya Avşar, REVÂNÎ DÎVÂNI, KÜLTÜR VE TURİZM BAKANLIĞI YAYIMLARI ,ISBN 978-975-17-3352-8
0
0
Yorum Yapmak için Kayıt Olun veya Giriş Yapın