VEZÎR DEFTERDÂR MEHMED PAŞA′YA VERİLMİŞDÜR
22.07.2017
VEZÎR DEFTERDÂR MEHMED PAŞA′YA VERİLMİŞDÜR
Lutf-ı sabâdan açıldı gül-i gülzârlar
Bülbüli mest eyledi sâgar-ı zer-kârlar
Mu‘tedil oldı hevâ esdi nesîm-i seher
Mazhar-ı feyz oldılar gonça-i bîdârlar
Erdi dem-i nev-bahâr oldı müzeyyen yine
Zînet-i ezhâr-ıla ferş-i çemenzârlar
Ceyb-i gülistân pür dirhem-i ezhâr-ıla
Sünbül ü lâleyle hem dâmen-i kuhsârlar
Kuhl-nümâyı sabâ çekdügi dem açdılar
Hâb-ı ‘ademden gözin nergis-i bîmârlar
Berg ü şükûfeyle her şâhı murassa‘olup
Sidre-misâl oldılar nahl-i direm-dârlar
Zînet-i gülzârı seyr etmege ‘azm etdiler
Cilve-künân nâz-ıla şâhid-i bâzârlar
Ol kadar a‘lâlıgı var harem-i gülşenün
Nakş-ı gül ile münakkaş der ü dîvârlar
Perdeler asdı der-i kasr-ı gülistâna gül
Yer yerin etrâfına çekdi sabâ zârlar
Hazret-i destûr-ı ekrem gele şâyed deyü
Turma düşer reh-güzâra gül-i bî-hârlar
Şimdi odur hâfız-ı kişver-i şâhenşehî
Çâker-i ‘unvânıdur hâme-i zer-kârlar
Kıble-i ikbâl-i erkân-ı sa‘âdet odur
Efser-i iclâle zîbi dür-i şehvârlar
Mezra‘a-i dîn ü İslâmun odur hâfızı
Re’yi cerâd-ı ‘adû leşkerine sârlar
Gâzîlere okudur sûre-i Enfâl′i ol
Feth-i memâlik eder göndere ser-dârlar
Melce’-i ashâb-ı hâcât u murâdât odur
Bende-i dergâhıdur cümle recâvârlar
Dergehi dârü’ş-şifâ mürdeler ihyâ eder
Şerbet-i lutfın umarlar kamu bîmârlar
Câ’ize-bahş-ı ekâbirdür o kân-ı kerem
Sâ’il-i keffi anun bahr-ı güher-bârlar
Eyle Beyânî du‘â-y-ıla senâsın tamâm
Fâtiha-i hayr ola hâtime-i kârlar
Şi‘rini ehl-i suhan ede Süreyyâ-misâl
Söylene medhinde tâ nazm-ı dürer-bârlar
Dâ’ire-i devleti ola muhît-i cihân
Sâbit ola nite kim nokta-i pergârlar
Mihr ü meh ü kevkeb-i sâbit ü seyyâreler
Devlet ü iclâline ola nigeh-dârlar
Başpınar, Fatih (2008). 17. Yüzyıl Şairlerinden Beyânî’nin Divan’ı, İnceleme-Tenkitli Metin. Doktora Tezi. İstanbul: Marmara Ünv. 166-167.
Yorum Yapmak için Kayıt Olun veya Giriş Yapın