Dîvân'dan
Gazel
Vücûd-ı Mutlakun bahri ne mevci kim ider peydâ
Ene’l-hak sırrını söyler eger mahfî eger peydâ
Meâdîndür kamu eşyâ ider öz kendi zâtından
Kimisi sîm ü zer zâhir kimi seng ü meder peydâ
Bu bâgun ger hakîkatde suyı bir bâgbânı bir
Velî olmuş hakâyıkdan nice yüzbin şecer peydâ
Nazar kıl nev-i insâna kimi zehr ü kimi sükker
Aceb hikmet bir agaçdan olur dürlü semer peydâ
Düzülür nice bin işler bozulur nice cünbişler
Ne kâr-ı bü'l-acebdür bu kim olmaz kârger peydâ
Bu dokuz kubbe vü şeş sû içünde geldün ü gitdün
Ne geldigün kapı zâhir ne gittigün memer peydâ
Şu serverler ki daglar gibi baş egmezdi eflâke
Yatarlar yerde pest olmış ne tîg u ne kemer peydâ
Yolumuz bir beyâbâna irişdi nâgehân k'ana
Girer bin kârbân olmaz birinden bir eser peydâ
Nice şûrîde âşıklar gezerler cümle tâyihler
Bu tîh-i bî-nihâyetde ne reh ne râhber peydâ
Nice gündüz gece oldı nice bin ay u yıl geldi
Dirîgâ olmadı kaldı şeb-i kadre seher peydâ
Nice zahmet çeker kesb-i kemâl idince bir ârif
Belî çok kan yudar kân eyleyince bir güher peydâ
Nice bin âdem oglanı helâk olmak gerek tâ kim
Yalancı kahbe dünyâdan ola bir gerçek er peydâ
Kamu nezzârede ebkâr-ı ma'nî muntazırlardır
Usûlî gibi tâ kim ola bir sâhib-nazar peydâ
İsen, Mustafa (hzl.) (1990). Usûlî Dîvânı. Ankara: Akçağ Yay. 97.