Yâ İlâhî vahdetiñ bir haddi yok ‘ummân mıdur
06.06.2016
Fâ‘ilâtün Fâ‘ilâtün Fâ‘ilâtün Fâ‘ilün
1 Yâ İlâhî vahdetiñ bir haddi yok ‘ummân mıdur
Yâ kulum sen geldügüñ yol her kula âsân mıdur
2 Yâ İlâhî dâr-ı ‘izzet dinilen menzil nedür
Kıldıgım saña hidâyet herkese ihsân mıdur
3 Pâdişâhım çâresizler derdine dermân nedür
Añlama ‘aşkım benüm her dertsüze dermân mıdur
4 Pâdişâhım her kuluñda yok mıdur ‘ilm ü kemâl
Sakla râzıñ, her şeye ben virdügüm ‘irfân mıdur
5 Lutf idüp her kula kılsañ vaslıñı ihsân n’ola
Açma bu sırrı sakın her gördügüñ insân mıdur
6 Mustafânıñ hurmetiyçün eyleme senden cüdâ
Gam yime sen her kişi baña ulu burhân mıdur
7 Vir Sinân Ümmîye sen bir togrı yol dergâhıña
Fazlıñ olmasa yolumda kurdugı erkân mıdur
Doç. Dr. A. Azmi BİLGİN,ÜMMÎ SİNAN DİVANI,K.veTurzm.Bak.,ekitap.kulturturizm.gov.tr
