Yazdı bu fethi ‘Utarid mâh-ı tâbân üstine

 

Fâ‘ilâtün/ Fâ‘ilâtün/ Fâ‘ilâtün/ Fâ‘ilün

 

Yine bir medh okudum bezm içre cânân üstine

Ser-be-ser hep ehl-i meclis tutdılar cân üstine

Ey tabîbüm la‘lüñe her biri cân eyler fidâ

Hasteler ölmiş kırılmış gibi dermân üstine

Sînemüñ esdâfı eyler ‘âleme dürler nisâr

Ebr-i çeşm îsâr ider çün âb-ı nîsân üstine

Hâk-i cismüm bir çemenzâr-ı mahabbetdür benüm

Tâze güller açılur yagdukça bârân üstine

Berf ü bârân oldı nâzil sanmañuz gökden yire

Gitdi ‘Osmân leşkeri şâh-ı Horasân üstine

Minber-i ‘izzetde nusret hutbesin okur melek

Şeh Murâd bin Selîm bin Süleymân üstine

Husrev-i encüm-sipâh aldı ‘Acem mülkin yine

Yazdı bu fethi ‘Utarid mâh-ı tâbân üstine

Rub‘-ı meskûnı eger zabt eylese olmaz ‘aceb

Basdı pây-ı himmeti gerdûn-ı gerdân üstine

Soñra geldüm gerçi ey Ravzî belâgat bezmine

Sikke kodum ben sühan-dânlıkda Selmân üstine

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009