Yirüñ senüñ ne yirdür ayıtdum Haleb Haleb

 

 

Mef‘ûlü/ Fâ‘ilâtü/ Mefâ‘îlü/ Fâ‘ilün

 

Bir hûb Rûmi didi baña hey ‘arab ‘arab

Yirüñ senüñ ne yirdür ayıtdum Haleb Haleb

Engûr-ı la‘l-i nâbını sordum o goncenüñ

Gül gibi güldi nâz ile didi ‘ineb ‘ineb

Didüm efendi kûyuña gelmiş rakîb-i har

Didi nedür murâdı ayıtdum hatab hatab

Hurmâ-yı la‘l-i yâre ne dirsin didi didüm

Ey nahl-i bûstân-ı melâhat ratab ratab

Beñzi sararsa ‘âşık-ı dil-hastenüñ eger

Didi ne dirler aña ayıtdum zeheb zeheb

Girmiş rakîb-i seg yine bir şekl-i mühmele

N’olduñ diyen kimesneye aydur cereb cereb

Gün yüzüñe bakılmaz olupdur şu‘â‘dan

Ey meh güneş gibi yalabırsın yalap yalap

Murg-ı visâl-i yâri şikâr itmek isteyüp

Şeh-bâz-ı cân u dil talabırlar talab talab

Bir dahı sarayın diyü cânânı sîneye

Ey pîrehen yine dolabırsın dolap dolap

Ol hâce-i zâmâne ki dünyâya meyl ide

Anuñ sakalını n’ola yolsam kelep kelep

Ravzî fesâhati niçe bu şi‘rimüñ didüm

Ol menbâ‘-ı belâgat ayıtdı ‘aceb ‘aceb

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009