Fâ‘ilâtün Fâ‘ilâtün Fâ‘ilâtün Fâ‘ilün

Zâhidâ sen ‘ilm-i hakkı tevhîdi ‘irfânda gör
Dürr-i a‘zam ister-iseñ haddi yok ‘ummânda gör

Ahsen-i takvîm dinildi şânıña insân-iseñ
Geç bu sûret nakşını gel ma‘ni’i insânda gör

Sûre-i Seb‘u’l-mesânîdür bizüm tefsirimüz
Aç gözüñ Ümmü’l-kitâbıñ vechini bak sende gör

Zâhir ü bâtın hezârân derdiñe ‘ayn-i devâ
‘İlm-i gayb-ıla kemâl-i hikmeti Lokmânda gör

Mazhar-ı ‘ilm-i Hudâ bil kalbiñi ey bahtlu
Hak buyurdı kim bu remzi âyet-i Kur’ânda gör

Ten fenâdur kıl fenâ evvel fenâ ölmezden öñ
Cân bekâdur ir bekâya sen seni Rahmânda gör

Ey Sinân Ümmî sakın aldanma agyârdan arın
Gün bugündür ir bugün ol yâr-ıla mihmânda gör

 

 

Ümmi Sinan  TÜM Şiirleri

ÜMMİ SİNAN ( ELMALILI - 17. YY ) HAYATI VE ŞAİRLİĞİ