Zevk-i şarâb-ı nâb peymâneler de bilmez
14.04.2016
Mef‘ûlü Fâ‘ilâtün Mef‘ûlü Fâ‘ilâtün
1.Zevk-i şarâb-ı nâb peymâneler de bilmez
Ser-hïş-ı bezm-i şevkı mey-hâneler de bilmez
2.Her zerre bir defîne her kuvve bir hazîne
Ol nükte-i hafî ne vîrâneler de bilmez
3.Hâb-âver olmanuñ hîç aslın ider mi idrâk
Benden işit bu sırrı efsâneler de bilmez
4.Şeh-mât kimden olsun niçün piyâde kalsun
Fil i‘tibâr bulsın ferzâneler de bilmez
5. Bu söz ü sâz neymiş sûziş ne gûne şeymiş
Bu sırrı kaç seneymiş pervâneler de bilmez
6.6a Ol zülf o perçem ol an dilden çıkar mı bir an
Hâlüm neden perîşân hîç şâneler de bilmez
7. ‘Unsur sadef göñüldür bu hârdur o güldür
Kandan bu çâr-asdâf dür-dâneler de bilmez
8. Sevdâ-yı ‘ışk-ı zevki Kânî nedendür âyâ
Esrârını cünûnuñ dîvâneler de bilmez
Dr. İlyas YAZAR , K Â N Î D Î V Â N I, Ankara 2012
0
0
Yorum Yapmak için Kayıt Olun veya Giriş Yapın