Bâgınga yitmesün âşûb hazândın yâ Rab

 

 

Bâgınga yitmesün âşûb hazândın yâ Rab

Gül bile vü servinge âsîb zamândın yâ Rab

 

Aldı cân la’li vü ilge lebi cân birgüçiler

Barça kul bolsun anıng allıda cândın yâ Rab

 

Derdini bes ki nihân tuttum olarmın pinhân

Vâkıf itkil anı bu derd-i nihândın yâ Rab

 

Yaman ahvâlime köz salmadı ol ay yahşi

Yahşi âgâh kıl anı bu yamandın yâ Rab

 

Yüz cihân zulm cihân ehli manga kıldı mini

Fârig it ehl-i cihân birle cihândın yâ Rab

 

Biriben könglüme cem’iyyet-i hâtır kutkar

Her ni kim andın irür tefrika andın yâ Rab

 

Kûyide hecr figânın ki Nevâyî tartar

Hem mini hem anı kutkar bu figândın yâ Rab

 

Levend, Agâh Sırrı (1966). Ali Şir Nevaî, II. Cilt Divanlar. Ankara: TDK Yay. 159