Bī-çāre göñül bilmezem āvāre nedendür
21.10.2020
Mefʿūlü mefāʿīlü mefāʿīlü feʿūlün
Bī-çāre göñül bilmezem āvāre nedendür
Dermān nedürür bilsem aña çāre nedendür
Her dem felegüñ cevri ile yār cefāsı
Bilsem ki bu ben baẖt·ı siyeh-kāre nedendür
Çeşmi baña vaṣlını ḥarām eyledi yārüñ
Ben ḳanı ḥelāl itdüm o ẖūn-ẖ*āre nedendür
Çün delmezimiş ġamzeleri ẖançeri baġrum
Bes bu yüregümde görinen yāre nedendür
Can bülbüli nālān ide gülzār·ı ẖaddüñden
Sen yüz viresin iy yüzi gül ẖāre nedendür
Ben ayaġuñı öpmeġe cānlar ḳılam īs̲ār
Rāygān viresin būse sen aġyāre nedendür
Mihrī çeke cevrüñi vü luṭfuñ göre aġyār
Devlet aña ẕillet bu cefā-kāre nedendür
Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4
