Bizden oldunsa rakîbün sözile ...Murabba
Murabba’
Bizden oldunsa rakîbün sözile bîzâr hey
Güc ile gökçeklik olmaz neyleyelüm var hey
Eksük olmaz bu cihândur âşıka bir yâr hey
Ben de senden vâz geldüm vâz geldüm var hey
Bulınur hey bu cihânda tâze tâze hûblar
Nâzenînler hûblar u mergûblar u mahbûblar
Rûy‑ı âlemde hemân kat’ olmadı mergûblar
Ben de senden vâz geldüm vâz geldüm var hey
Bî‑vefâ mahbûblara rîş‑hande âşıklar gerek
Sâdıku’l‑kavl olana yâr‑ı muvâfıklar gerek
Gerçegi terk it yüri sana münâfıklar gerek
Ben de senden vâz geldüm vâz geldüm var hey
Mısr‑ı dilde Yûsuf‑ı cândan azîz itdüm seni
Cevr ile pîr eyledün âhir Zelîhâ‑veş beni
Yâr idinmek yoğımış bildüm ki her cilf oglanı
Ben de senden vâz geldüm vâz geldüm var hey
Yüzüni görmege gerçi kim virürem cânı ben
Sen dahi hûblarda bir âşık‑perest idün inen
Gördügünce beni igmâz idüp ayruklanma sen
Ben de senden vâz geldüm vâz geldüm var hey
Gerçi aşkın nârına düşelden itdüm hayli âh
Dûd‑ı âhım âhir itdi gün cemâlini siyâh
Sen gedâ‑yı hûb oldun Mihrî aşka pâdişâh
Ben de senden vâz geldüm vâz geldüm var hey
Arslan, Mehmet (hzl.) (2007). Mihrî Hâtun Divanı. Ankara: Amasya Valiliği Yay. 277, 311, 333.
