Cān boynıña zülfeynüñ ʿanber-resen olmışdur
21.10.2020
Mefʿūlü mefāʿīlün mefʿūlü mefāʿīlün
Cān boynıña zülfeynüñ ʿanber-resen olmışdur
Işḳ ehline dergāhuñ ḥubbü'l_vaṭan olmışdur
Hicrüñle gözüm yaşı yaġmur gibi yaġaldan
Başdan başa bu ʿālem çayır çemen olmışdur
Dil bülbüli feryādın artursa ʿaceb midur
Şeydā ḳılan anı sen ġonca-dehen olmışdur
Cevrüñle beni cānā öldürme taḥammül it
ʿIşḳuñ ġamıyla ẖod baña olan olmışdur
Yoluñda senüñ cānā bilmem ne günāh itdüm
Cevrüñ baña aġyāra luṭfuñ neden olmışdur
Ḥaḳḳā ḳad ü ẖaddüñüñ kim olsa hevāsında
Tābūt aña serv olup gülden kefen olmışdur
Gül ruẖlaruñuñ çoḳdur ʿuşşāḳ·ı dili ammā
Çeşmine raḳībüñüñ Mihrī diken olmışdur
Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4
