Dili virdüm yalıñuz ṣanma saña cān biledür

Feʿilātün feʿilātün feʿilātün feʿilün

Dili virdüm yalıñuz ṣanma saña cān biledür
Dil nedür cān daẖi cānā saña ḳurban biledür

Geçdi ey ḳaşı kemān ġamzeñ oḳı cāndan öte
Daẖi çeşmüñ niçe bir sīneme müjġān biledür

N'idelüm gözden ıraġ oldıñise dōst yeter
Çün ẖayālüñ dil·i vīrānuma mihmān biledür

Görüp ol yāri baña söylemesün diyü raḳīb
Muttaṣıl sāye gibi gör nice şeyṭān biledür

Mihrī bülbül gibi efġānuñı dilden ḳoma kim
Lāle ẖaddinde anuñ çün gül·i ẖandān biledür

Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4

Mihri Hatun Hayatı Şairliği