Bî-vücûdam aşk odı bilsem benüm nem yandurur
Yanuben küllî kül oldum bes dahı nem yandurur
Yandurur gerçi cihânda aşk odı âşıkları
Lik ben âciz kulunı katı muhkem yandurur
Âh idersem bir nefes dünyâyı oda yahuben
Yedi çarhı anun odı cümle derhem yandurur
Nice döysün aşk odınun sûzişine dil revân
Kim anun germiyyeti nâr-ı cehennem yandurur
Şem‘e bir pervâne yansa sûziş-i âvâz ider
Ma‘şûkun sözi meni gör nice ebsem yandurur
Ey ciger derdine dermân isteyen aklun kanı
Onılur mı şol yara kim anı merhem yandurur
Çünki derd imiş devâsı bu yürek yarasınun
Müşfik emsem isteme kim anı emsem yandurur
Rûşenî aşkına yanmışdur ciger dir Gülşenî
Aşk odı pervâne kimi anı her dem yandurur
(Akay, Mehmet (1996). İbrahim Gülşenî’nin Divanı: Metin-Dil Hususiyetleri. Doktora Tezi. Konya: Selçuk Üniversitesi. 42-43.)
0
0
Yorum Yapmak için Kayıt Olun veya Giriş Yapın