Gazel

 

Fâilâtün fâilâtün fâilâtün fâilün

 

Ey cemâl-i enverün mir’ât-ı zât-ı kibriyâ

Safha-i rûyunda lâmi’ pertev-i nûr-ı Hudâ

 

Ser-te-ser eşyâ cemâlünden görindi âşikâr

Hüsn-i ‘âlem-tâbı ey âyîne-i gîtî-nümâ

 

Kıldı zerrât-ı cihânı hep mecâlî-i zuhûr

Dinse lâyık zâtuna şems-i sipihr-i ıstıfâ

 

Cilvegâhundur harîm-i vuslat-ı Hak Cebra’ îl

Ey şeh-i taht-ı risâlet hâdimün olsa n’ ola

 

Enbiyâ hayli tufeylün nice olmaz yâ Nebî

Sen şeh-i levlâke mesned kurb-ı ev-ednâ ola

 

Teşnegân-ı vâdî-i şevkun kalur mı nâ-ümîd

Sâkî-i bezm-i visâlündür çü hâs-ı evliyâ

 

Oldı Kur’ân-ı kerîmü’ ş-şân sana hulk-ı ‘azîm

Vasf-ı ahlâk-ı cemîlün yâ nice mümkin edâ

 

Hâtemiyyet hatmini urdun risâlet gencine

Kaldı pes taht-ı nigînünde kamu mülk-i bakâ

 

İmtinân-ı ‘âcizânüz sen şefâ’at hâzini

Yâ şefî’a’ l-müznibîn eşfa’ lenâ eşfa’ lenâ

 

Hem dahı olsun pey-ender-pey tahiyyât u selâm

Âl ü ashâbuna k’ anlardur nücûm-ı ihtidâ

 

Kanda Nehcî kanda semt-i hâs-ı na’t-ı şâh-ı dîn

Himmet-i pîr olmasa ger ol fakîre reh-nümâ (Aslan 2012: 99)

 

Üzeyir ASLAN, BESNİLİ NEHCÎ DEDE (1616-1680?) ve DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3372, ANKARA 2012